गुल्मीका ५ वटा गाउँपालिका भाडाका भवनबाट सञ्चालन,केहिका पालिकाको भवनहरू निर्माणाधीन

गुल्मीका ५ वटा गाउँपालिका भाडाका भवनबाट सञ्चालन,केहिका पालिकाको भवनहरू निर्माणाधीन ।
तिलाचन पाण्डे
असोज १०

स्थानीय तह गठनको छ वर्षभन्दा बढी समय बित्दा पनि गुल्मीका पाँच स्थानीय तहका कार्यालय भाडाकै भवनबाट सञ्चालन हुँदै आएका छन् । आफ्नै प्रशासकीय भवन नहुँदा स्थानीय सरकारको रकम कार्यालय भाडामै खर्च हुने गरेको छ ।

मुसीकोट नगरपालिका, इस्मा, गुल्मीदरबार, कालीगण्डकी र चन्द्रकोट गाउँपालिका भाडाकै भवनबाट सेवा प्रवाह गरिरहेका छन् । इस्मा गाउँपालिकाले २०७४ सालदेखि भाडाकै भवनबाट सेवा प्रवाह गरिरहेको छ । भवनका लागि मासिक ३३ हजारका दरले भाडा बुझाउँदै आएको गाउँपालिकाका सूचना अधिकारी नारायण महतले जानकारी दिनुभयो । वडा नं। २ को वडा कार्यालय पनि भाडामा बस्दै आएको उहाँले जानकारी दिनुभयो ।

चन्द्रकोट गाउँपालिकाले स्थापनाकालदेखि नै चन्द्रकोट क्याम्पसको भवनबाट सेवा प्रवाह गर्दै आएको छ । मासिक ९७ हजार रुपियाँ क्याम्पसलाई भाडा बुझाउँदै आएको गाउँपालिकाका सूचना अधिकारी शिवप्रसाद ज्ञवालीले जानकारी दिनुभयो ।

गुल्मीदरबार गाउँपालिकाले तीन वटा भवनको मासिक ७४ हजार ९५१ रुपियाँ मासिक भाडा तिर्ने गरेको सूचना अधिकारी नवराज भण्डारीले जानकारी दिनुभयो । कालीगण्डकी गाउँपालिकाले दुई वटा भवन भाडामा लिएको छ । सो पालिकाले मासिक ९० हजार भाडा तिर्ने गरेको गाउँपालिकाका सूचना अधिकारी ओमबहादुर थापाले जानकारी दिनुभयो । यस्तै वडा नं। १, ४ र ७ का वडा पनि भाडामा रहेको पालिकाले जनाएको छ । मुसीकोट नगरपालिकाले दुई वटा भवनको मासिक ६२ हजारका दरले भाडा बुझाउँदै आएको सूचना अधिकारी मुना ज्ञवालीले जानकारी दिनुभयो । यस्तै २, ३, ४ र ७ नम्बर वडा कार्यालय पनि भाडाकै भवनमा रहेका छन् ।

मुसीकोट नगरपालिका, धुर्कोट गाउँपालिका, रुरुक्षेत्र गाउँपालिका र चन्द्रकोट गाउँपालिकाका प्रशासकीय भवनहरू निर्माणाधीन अवस्थामा छन् । मदाने गाउँपालिकाले साबिकको गाविस कार्यालय, मालिकाले गाउँपालिकाको सभा हल, धुर्कोट गाउँपालिकाले बहुउद्देश्यीय सभा हल, छत्रकोट, सत्यवतीले सभा हलबाट र रुरुक्षेत्र गाउँपालिकाले कृषि सम्पर्क कार्यालयको भवनबाट सेवा प्रवाह गरिरहेको छ । रुरुक्षेत्र गाउँपालिकाको प्रशासकीय भवन निर्माणको अन्तिम चरणमा रहेको गाउँपालिकाका अध्यक्ष यदु ज्ञवालीले जानकारी दिनुभयो । कालीगण्डकी गाउँपालिकाले प्रशासकीय भवन निर्माणका लागि यस वर्ष केही रकम विनियोजन गरेकाले भवन निर्माणको प्रक्रिया तीव्र गतिमा भइरहेको गाउँपालिकाका अध्यक्ष वेदबहादुर थापाले जानकारी दिनुभयो ।

About Author

रुरु संचार मिडिया प्रा.लि
रुरु संचार मिडिया प्रा.लि
Articles: 853

Leave a Reply

Your email address will not be published. Required fields are marked *