रुरुक्षेत्र ४ रानीबासमा प्रहरी चौकी स्थापना, स्थानियको वर्षौ देखिको सपना पूरा

भुवन भुसाल, गुल्मी । गुल्मीको रुरुक्षेत्र गाउँपालिकामा प्रहरी चौकी रुरुको स्थापना गरिएको छ । रुरुक्षेत्र गाउँपालिकाको वडा नं ४ रानीवासमा प्रहरी चौकीको आज एक कार्यक्रमका बीच स्थापना गरिएको हो ।

 

 

रुरुक्षेत्र गाउँपालिका अध्यक्ष यदु ज्ञवालीको अध्यक्षतामा सम्पन्न कार्यक्रममा गाउँपालिका उपाध्यक्ष मिनादेवी गौतम, जिल्ला प्रहरी कार्यालय गुल्मीका प्रमुख नवीन किशोर प्रधान, रुरुक्षेत्र गाउँपालिकाका प्रमुख प्रशासकीय अधिकृत लक्ष्मण पाण्डे, ईलाका प्रहरी कार्यालय रिडिका प्रमुख अनिल थापा, वडा अध्यक्षहरु, कार्यपालिका सदस्य हरु, राजनीतिक दल, स्थानिय संघसस्था लगायतका प्रतिनिधि एवम् स्थानियको उपस्थिति रहेको थियो ।

 

प्रहरी चौकी रुरुको उदघाटन गर्दै गाउँपालिका अध्यक्ष ज्ञवालीले शान्ती सुब्यवस्था आफुहरुको पहिलो आवश्कता रहेको बताउनुभयो । उहाँले जनता संग जोडिएर अपराध नियन्त्रण, अनुसन्धान गर्दै शान्ती स्थापना गर्न आग्रह गर्नुभयो । उहाँले स्थापनाको सुरुवाती पहलकर्ता पुर्व मुख्य सचिव लीलामणी पौड्याल लगायत हाल जग्गादाता सम्मलाई आभार व्यक्त गर्नुभयो । उपाध्यक्ष मिनादेवी गौतमले प्रहरी चौकी स्थापनामा सहयोग गर्ने सबैमा धन्यवाद दिंदै अब अझै शान्त रुरुक्षेत्र बन्ने बिष्वास व्यक्त गर्नुभयो ।

कार्यक्रम लाई संबोधन गर्दै गुल्मी जिल्लाका प्रहरी प्रमुख, प्रहरी उपरीक्षक प्रधानले यस क्षेत्रमा प्रहरी चौकी स्थापनाको लागी मेहनत गर्ने सबैलाई धन्यवाद दिनुभयो । पहिले नै जग्गा व्यवस्थापन भएपनी प्रहरी प्रधान कार्यालयले गर्ने नापजाँच गर्दा नपुगेकाले बजेट फिर्ता जाने अवस्था बनेको भन्दै दु:ख समेत व्यक्त गर्नुभयो । उहाँले प्रहरी पनि यहीँ समाजको अभिन्न अंग रहेको भन्दै यहाँका नागरिकको जिउ,धनको सुरक्षा गर्न तत्पर रहेको बताउनुभयो । उहाँले आम नागरिकको हितमा काम गर्न प्रहरीलाई निर्देशन समेत दिनुभयो । समुदाय संग साझेदारी गर्दै काम गर्न उहाँले निर्देशन दिनुभयो ।

 

नागरिक ढुक्क संग काम गर्न सक्ने, आफ्ना दैनिक कार्य संचालन गर्न सक्ने गरि आफुहरुले भुमिका निर्वाह गरिरहेको बताउनुभयो । उहाँले अपराध अनुसन्धानमा नेपाल प्रहरी अब्बल रहेको भन्दै कुनै पनि अपराध गर्ने व्यक्ती उम्कन नपाउने बताउनुभयो । कार्यक्रममा स्वागत मन्तव्य राख्दै पालिकाका प्रमुख प्रशासकीय अधिकृत लक्ष्मण पाण्डेले प्रहरी चौकिको स्थापना भए संगै यस क्षेत्रको शान्ती सुरक्षा कायम राख्दै अमनचयन बढाउन उल्लेख्य भुमिका खेल्ने बताउनुभयो । उहाँले प्रहरी चौकी स्थापना गर्न सहयोग गर्ने सबैलाई धन्यवाद दिनुभयो ।

 

वडा नं ५ का वडा अध्यक्ष हरि प्रसाद ज्ञवालीले पहिले प्रहरी आवस्यक पर्दा रिडि र श्रिङ्गा गुहार्नु पर्ने अवस्था बाट मुक्ती मिलेको भन्दै खुशी व्यक्त गर्नुभयो । उहाँले गाउँपालिका अध्यक्ष, प्रहरी प्रमुख संगै प्रहरी चौकी स्थापनाको पहल गर्ने पुर्व मुख्य सचिव लीलामणि पौड्याल, जग्गा दाता यदुनाथ पौड्याल, कल्पना पौड्याल लगायत भुमिका खेल्ने सबैलाई धन्यवाद दिनुभयो ।

 

नेकपा समाजबादिका प्रतिनिधि नरहरी ज्ञवालीले प्रहरी समाजको अभिन्न अंग रहेको भन्दै रुरु प्रहरी चौकीले यो क्षेत्रमा सुरक्षा र आपत बिपतमा सहयोग गर्न सकोस भन्ने कामना गर्नुभयो । उद्योग बाणिज्य संघ बलेटक्सारका गंगा प्रसाद ज्ञवालीले प्रहरी चौकी स्थापना भए संगै यहाँका सबै खुसी भएको बताउनुभयो । असई सहित ११ जना प्रहरी रहने गरि प्रहरी चौकीले आज देखि आफ्नो सेवा सुरु गरेको छ ।

About Author

रुरु संचार मिडिया प्रा.लि
रुरु संचार मिडिया प्रा.लि
Articles: 871

Leave a Reply

Your email address will not be published. Required fields are marked *