बगनासकालीका ९ वटै वडामा संचालित शिविर सम्पन्न २१ सय ३४ जनाले लिए सेवा

दयाराज न्यौपाने
पाल्पा – बगनासकाली गाउँपालिकामा प्रजनन स्वास्थ्य रुग्णता व्यवस्थापन तथा निःशुल्क बृहत स्वास्थ्य शिविर सम्पन्न भएको छ ।
टोल तथा बस्तिहरुमा रहेका महिलाहरुको स्वास्थ्य सम्बन्धी विभिन्न किसिमको समस्याहरुलाई समाधान गर्ने उदेश्यका साथ बगनासकाली गाउँपालिका स्वास्थ्य शाखाको आयोजनामा शिविर सञ्चालन गरिएको हो ।
शिविर बैशाख १४ गते स्वास्थ्य चौकी खानीछाप बाट सुरु गरिएको थियो ।

शिविर बराङ्दी,खानीगाउँ,यम्घा,दर्लमडाँडा,नायरनमतलेस,चापपानी, चिर्तुङधारा हुँदै आइतबार पोखराथोक स्वास्थ्य चौकीमा पुगेर सम्पन भएको स्वास्थ्य शाखा प्रमुख मणिराम अधिकारीले बताउनु भयो । उहाँले २ हजार १ सय ३४ जनाले सेवा लिएको समेत जानकारी दिनु भयो । शिविरमा पाठेघरको मुखको क्यान्सर जाँच गरिएको छ भने आङ खस्ने रोगको प्राथमिक उपचार र परिवार नियोजनको अस्थायी साधन इम्प्लान्ट,आयुसिडी प्रयोग सम्बन्धी सहित प्रयोगशाला सहितको सुबिधा प्रदान गरिएको थियो ।


शिविर समापन समारोहमा जिल्ला समन्वय समिति पाल्पाका प्रमुख टंकनाथ खनालले स्वास्थ्य क्षेत्रमा बगनासकालीले गरेको प्रयास अनुकरणीय रहेको बताउनु भएको छ । उहाँले अन्य पालिकामा समेत यस किसिमको कार्यक्रम प्रभावकारी हुने बताउनु भयो ।


गाउँपालिकाका नागरिकको स्वास्थ्यलाई प्रमुख प्राथमिकतामा राखेर काम गरिरहेको बगनासकाली गाउँपालिकाका अध्यक्ष सरस्वती चिदीले बताउनु भयो ।उहाँले सोही अनुरुप विभिन्न प्रकारका शिविर सञ्चालन गरि नागरिकहरुलाई सेवा प्रवाह गरिरहेको चिदीले बताउनुभयो । गाउँघरमा अझै पनि प्रजनन स्वास्थ्य सम्बन्धी जटिल समस्या रहेको बताउँदै उहाँले आगामी दिनहरुमा टोलटोलमा विभिन्न प्रकारका स्वास्थ्य सेवा उपलब्ध गराईने बताउनुभयो । बगनासकाली गाउँपालिकाका उपाध्यक्ष हरिप्रसाद पाठकले सबै क्षेत्रको सहयोगले शिविर सम्पन्न भएको बताउनु भयो ।
गाउँ तथा टोलका नागरिकहरुलाइ स्वास्थ्य क्षेत्रको पहुँचमा पुर्याउन शिविर सफल भएको प्रमुख प्रशासकीय अधिकृत बद्रिनाथ लम्सालले उल्लेख गर्नु भयो ।


परिवार नियोजन संघ पाल्पाका प्रवन्धक सोवाकान्त न्यौपानेले शिविरमा पाठेघरको क्यान्सर जस्ता रोग देखापरेको र बेलैमा उपचार गर्ने सुझाएको बताउनु भएको छ । उहाँले बिरामीको थप उपचारमा सहयोग गर्ने प्रतिवद्द्ता समेत जनाउनु भएको थियो ।


समापन समारोहमा जिल्ला स्वास्थ्य कार्यालय पाल्पाका प्रमुख डा.राजेन्द्र गिरि,सूचना अधिकारी टीकाराम अधिकारी, बगनासकाली गाउँपालिकाका प्रवक्ता टीकाबहादुर थापा,युनाइटेड मिसन अस्पताल पाल्पाका दिपक बिसि,पोखराथोक स्वास्थ्य चौकीका प्रमुख सरोज काफ्ले, वडा नम्बर २ का वडाध्यक्ष तिर्थप्रसाद भट्टराई लगाएतले बगनासकाली गाउँपालिकाले जनताको पक्षमा गरेको स्वास्थ्य अभियान सफल भएको उल्लेख गर्दै स्वास्थ्य क्षेत्रमा हुने प्रगति अन्य सुचकको तुलनामा महत्वपूर्ण रहेको बताउनु भएको थियो ।


लुम्बिनी मेडिकल कलेज प्रभास,युनाइटेड मिसन अस्पताल तानसेन र नेपाल परिवार नियोजन संघ पाल्पाको प्राविधिक सहयोगमा शिविर संचालन भएको हो ।
सो अवसरमा शिविर सफल बनाउन सहयोग गर्नुभएका स्वास्थ्य कर्मी र सहयोगी संस्थालाई पाल्पाली दोसल्ला,मायाको चिनो, र सम्मान पत्रले सम्मान गरिएको थियो । बगनासकाली गाउँपालिकाका प्रतेक स्वास्थ्य चौकीका कर्मचारीहरु सहितले शिविरमा सेवा प्रदानगर्नु भएको थियो ।

यो खबर पढेर तपाईलाई कस्तो महसुस भयो ?

About Author

रुरु संचार मिडिया प्रा.लि
रुरु संचार मिडिया प्रा.लि
Articles: 853

Leave a Reply

Your email address will not be published. Required fields are marked *