Category: विचार

  • घोराहीमा भएको दुर्घटनामा दुई जनाको मृत्यु ,दुई घाइते

    घोराहीमा भएको दुर्घटनामा दुई जनाको मृत्यु ,दुई घाइते

    दाङ ।
    दाङको घोराहीमा भएको दुर्घटनामा दुई जनाको मृत्यु भएको छ भने दुई घाइते भएका छन् ।

    गए राति घोराही उपमहानगरपालिका–७ बेसाईमा सौडियारबाट सर्रातर्फ आउँदै गरेको रा३प २९२२ नम्बरको मोटरसाइकलले दुई साइकललाई ठक्कर दिएको प्रहरी नायब उपरीक्षक मुुकुन्दप्रसाद रिजालले जानकारी दिए ।

    उक्त दुर्घटनामा परी मोटरसाइकल चालक घोराही–१५ का ३५ वर्षीय गङ्गाबहादुर कुँवर र साइकलयात्री घोराही–७ का १६ वर्षीय रितेश केसीको मृत्यु भएको छ । दुवैको उपचारका क्रममा मृत्यु भएको प्रहरीले जनाएको छ ।

    दुर्घटनामा परी मोटरसाइकलमा सवार घोराही–७ का ३८ वर्षीय वसन्त चौधरी र साइकलयात्री सोही ठाउँका १५ वर्षीय विनोद भण्डारी घाइते भएका छन् ।

    घाइते दुवैको राप्ती स्वास्थ्य विज्ञान प्रतिष्ठान घोराहीमा उपचार भइरहेको छ ।

  • हर्मिचौर मविमा रेडक्रस सर्कल को पुनर्गठन

    हर्मिचौर मविमा रेडक्रस सर्कल को पुनर्गठन

    चुरामणि तिमिल्सिना,रिडी ।
    हर्मिचौर माध्यमिक बिध्यालय कालीगण्डकी गाउँपालिका गुल्मीमा म सेवा गर्छु भन्ने मुख्य उद्देश्यका साथ नेपाल जुनियर तथा युवा रेडक्रस सर्कल को पुनर्गठन गरिएको छ ।

    बिध्यालयका प्रधानाध्यापक तिलाचन पाण्डेको अध्यक्षतामा गरिएको कार्यक्रममा सुरज पाण्डे अध्यक्षमा चयन हुनु भएको छ ।

    यस्तै उपाध्यक्षमा प्रमिशा पाण्डे सचिवमा भावना पाण्डे उपसचिवमा प्रमिश न्यौपाने कोषाध्यक्षमा रामु पाण्डे उपकोषाध्यक्षमा पुजा पाण्डे चयन हुनु भएको छ ।

    यस्तै ,सदस्यहरुमा विवेक पाण्डे स्मृति तरामु हिमाल सुनार, विनिता सुनार रहनु भएको छ । यस्तै अन्य सदस्यहरुमा भगवान पाण्डे सागर पाण्डे ,साधना पाण्डे वसन्त पाण्डे प्रज्ञा पाण्डे रहनु भएको छ । सर्कलमा भीमलाल भुसाल शिक्षक नायक सहशिक्षक नायक गणेशराज उपाध्या र प्रधानाध्यापक तिलाचन पाण्डे संरक्षकमा रहनु भएको छ। गठित नयाँ समिती लाई सपथ ग्रहण यस्तै काम कर्तव्य अधिकार र जिम्मेवारी प्रदान गरिएको हो ।

    बिद्यालयमा गठित समितीले विभिन्न समयमा अतिरिक्त क्रियाकलाप सन्चालन गर्ने दुख परेका हरुको लागि विभिन्न अभियानहरु मार्फत सहयोग कार्यक्रम गर्ने विभिन्न समयमा मागका आधारमा तालिम पनि सन्चालन गर्ने नायक भुसालले जानकारी दिनु भयो ।

  • मनसुनी वायुको प्रभावले देशभर झरी,उच्च सतर्कता अपनाउन अपिल

    मनसुनी वायुको प्रभावले देशभर झरी,उच्च सतर्कता अपनाउन अपिल

    काठमाडौं ।
    मनसुनी वायुको प्रभावले देशभर झरी परेको छ। हिजोदेखि लगातारको वर्षाले जनजीवन प्रभावित बनेको छ।

    दाङको घोराही र आसपासको क्षेत्रमा आज बिहानै भारी वर्षा भएको छ। बबई लगायत अन्य स–साना नदीहरूमा आकस्मिक बाढी आउन सक्ने भएकाले यसका तटीय क्षेत्रमा भोलिसम्म उच्च सतर्कता अपनाउन बाढी पूर्वानुमान महाशाखाले अपिल गरेको छ।

    त्यस्तै कैलाली, कन्चनपुर र आसपास धेरै स्थानमा भारी वर्षा भएकाले कान्द्रा, मोहना, खुटीया लगायत साना नदीमा एक्कासी बाढी आउन सक्ने भन्दै सचेत गराइएको छ।
    कान्द्रा नदी बाढी मापन केन्द्र कैलालीमा जलसतहले सतर्कता तह पार गरेको र बढ्दो रहेको छ।

    गएरातिदेखि नै कास्की, स्याङजा, पाल्पा, कपिलवस्तु, रुपन्देही, अर्घाखाँची, नवलपरासी, प्युठान, दाङ, बाँके, कैलाली कञ्चनपुर, रुकुम, जाजरकोट, सुर्खेत,बारा, रौतहट, महोत्तरी, सर्लाही, काठमाण्डौ र आसपासका धेरै स्थानमा ठूलो वर्षा भएको छ।

    यी जिल्ला भएर बहने साना नदीमा आकस्मिक बहावको उच्च संभावना रहेको बाढी पूर्वानुमान महाशाखाको भनाइ छ ।

  • आज असार १५ अर्थात् राष्ट्रिय धान दिवस,दहीच्यूरा खाने दिन

    आज असार १५ अर्थात् राष्ट्रिय धान दिवस,दहीच्यूरा खाने दिन

    काठमाडौं ।
    प्रत्येक वर्ष असार १५ गते मनाइने धान दिवस आज खेतमा काम गरी दहीच्यूरा खाएर मनाइँदैछ ।

    विसं २०६१ मङ्सिर २९ गते मन्त्रिस्तरीय निर्णय गरी २०६२ असार १५ गतेदेखि राष्ट्रिय धान दिवस मनाउन थालिएको हो।
    कृषि प्रधान देश भएकाले नेपालका अधिकांश मानिसको पेशा खेतीपाती हो।

    किसान वर्षभरका लागि छाक जुटाउन यो महिना खेतीमा व्यस्त हुन्छन्। आजका दिन असारे भाकामा लोकदोहोरी गाउँदै छुपुछुपु हिलोमा धान रोपिन्छ। ‘छुपु र छुपु हिलोमा धान रोपेर छोडौँला, बनाई कुलो लगाई पानी आएर गोडौँला’ जस्ता लोक लयका गीत गाएर खेतमै रमाइलो पनि गरिन्छ।

    मध्य गर्मीको यो समयमा युवा लाठे र युवती रोपाहारले खेतका गराको हिलो छ्यापाछ्याप गरेर मनोरञ्जन गर्छन्।
    कामको चटारोले थकित भएका किसान शक्तिप्राप्तिका लागि दहीच्यूरा खान्छन्। यसबेला दही च्यूराले शरीरमा शीतलता भई शक्ति सञ्चय हुने विश्वास गरिन्छ।

    असार १५ लाई नेपाली समाजमा दही च्यूरा खाने पर्वका रुपमा पनि लिइन्छ। खेतीपातीबाहेक अन्य पेशा र व्यवसायमा लागेका नेपालीले पनि आज दहीच्यूरा खाई असार १५ मनाउँछन्।

    हाम्रो संस्कृतिमा दहीको स्थान महत्वपूर्ण छ।
    शुभकार्यका लागि घरबाहिर निस्कने,विदेश जाने आदि महत्वपूर्ण काम गर्नुअघि दही अक्षता मुछेर निधारमा रातो टीका लगाउने परम्परा छ।
    यस्ता शुभकाममा निस्कनुअघि सगुनका रुपमा पनि दही खुवाएर बिदाइ गरिन्छ। निस्कने बेलामा दही खाएर हिँडे साइत पर्ने जनविश्वास रही आएको छ।

    दही वैज्ञानिक दृष्टिले पनि स्वास्थ्यवद्र्धक मानिन्छ । गुरु गोरखनाथले नेपालको एकीकरणकर्ता पृथ्वीनारायण शाहलाई दही खान दिएर पराक्रमी हुने भविष्यवाणी गर्नुभएको थियो भनिन्छ।

    आयुर्वेदमा भोजनको अन्त्यमा दही मथेर बनाएको मही पिएमा औषधि उपचारका लागि स्वास्थ्यकर्मी कहाँ जानु नपर्ने बताइएको छ ।
    ‘भोजनान्ते पिबेत् तक्रं वैद्यस्य किं प्रयोजनम्’ भन्ने जस्ता वाक्य पनि आयुर्वेदमा उल्लेख गरिएको छ। दहीले पाचन शक्ति पनि बढाउँछ।

    पखाला लागेका बेला दहीच्यूरा खाएमा औषधिको काम गर्छ। यसैले दहीच्यूरा खाने संस्कारले नेपाली संस्कृतिमा बृहत् रुप लिएको छ।
    यसरी असार १५ गते नेपाली समाजमा राष्ट्रिय सांस्कृतिक पर्व बन्न सफल भएको छ।

  • रैनादेवीछहरामा पहिरोका कारण पसल भत्कियो

    रैनादेवीछहरामा पहिरोका कारण पसल भत्कियो

    पाल्पा ।
    पाल्पाको रैनादेवी छहरा गाउँपालिका भवन नजिकै पहिरो झर्दा एउटा पसल भत्किएको छ।

    वडा नम्बर ४ स्थित गाउँपालिका भवन अगाडि पहिरो जाँदा स्थानीय मंगल हिताङको पसल भत्किएको वडा नम्बर ३ का अध्यक्ष प्रदीप पौडेलले जानकारी दिए।

    पौडेलका अनुसार पहिरोले मानवीय क्षति नभए पनि पसल पूर्ण रूपमा क्षति भएको छ।

    वडा अध्यक्ष पौडेलका अनुसार पहिरोले गाउँपालिका भवन समेत जोखिममा परेको छ। गाउँपालिका भवन जोखिममा परेकोले तत्काल संरक्षण नगरिए ठूलो क्षति हुनसक्ने उनले बताए।

  • सिद्धार्थ राजमार्गको बुटवल–तानसेन सडकखण्ड अवरूद्ध

    सिद्धार्थ राजमार्गको बुटवल–तानसेन सडकखण्ड अवरूद्ध

    बुटवल ।
    दुई दिनदेखि परेको लगातारको वर्षाले ठाउँ ठाउँमा पहिरो जाँदा सिद्धार्थ राजमार्ग अन्तर्गत बुटवल–तानसेन सडकखण्ड अवरूद्ध भएको छ।

    यो सडकखण्डको आधा दर्जन बढी स्थानमा पहिरो झरेपछि बुधबार बिहानैदेखि आवागमन अवरूद्ध भएको लुम्बिनी प्रदेश ट्राफिक प्रहरी कार्यालय बुटवलले जनाएको छ।

    प्रहरीका अनुसार सिद्धबाबा देखिनै आधा दर्जन बढी स्थानमा पहिरो झरेपछि सवारीसाधनको आवतजावत बन्द भएको हो।

    माथिल्लो सिद्धबाबा मन्दिर नजिकै माथिबाट ढुङ्गा र लेदोसहितको पानीको छहरो झरेको छ। सिद्धार्थ राजमार्गकै पानी मिल,हिउँदे खोला, कालिमाटी, चर्चरे, चौबिस माईल, गौंडेपुल लगायतका क्षेत्रमा पहिरो खसेर सडक अवरुद्ध भएको प्रहरीले जनाएको छ।

    मंगलबार दिउँसो बर्षा केहिबेर रोकिए पनि रातिदेखि फेरि ठूलो वर्षा भइरहेको छ। पानी परिरहेकोले पहिरो गएको स्थानमा जान नसकेको प्रहरीले जनाएको छ ।

  • निरन्तरको वर्षाका कारण बागलुङका दुई ठूला राजमार्ग अवरुद्ध

    निरन्तरको वर्षाका कारण बागलुङका दुई ठूला राजमार्ग अवरुद्ध

    बागलुङ ।
    निरन्तरको वर्षाका कारण बागलुङका दुई ठूला राजमार्ग अवरुद्ध भएका छन् ।

    राष्ट्रिय गौरवको आयोजनाका रूपमा रहेको मध्यपहाडी पुष्पलाल लोकमार्गको गलकोटबाठ बुर्तिबाङ खण्ड र बागलुङबाट म्याग्दी जाने सडक पहिराले पूर्णरूपमा अवरुद्ध बनाएको छ ।

    लोकमार्गअन्तर्गत गलकोट नगरपालिका र ढोरपाटन नगरपालिकाको तुरतुरेमा पहिरो खस्दा सडक अवरुद्ध भएको जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।
    तुरतुरेमा बर्सेनि पहिरो खस्ने गरेको छ ।वर्षात्ले गलकोट नगरपालिका–१ दुदिलाभाटी र २ नरेठाँटी क्षेत्रमा समेत सडक क्षतविक्षत बनाएको छ ।

    यस्तै बागलुङबाट म्याग्दी जिल्ला जोड्ने मुख्य सडकसमेत पहिराले अवरुद्ध बनाएको छ ।

    बागलुङ नगरपालिका–४ र म्याग्दीको बेनी नगरपालिका–१ को सिमानास्थित डम्मरेखोला नजिकै पहिरो खस्दा सडक अवरुद्ध भएको छ ।
    निरन्तर पानी परिरहेकाले सडक खुलाउन समस्या भएको छ ।

  • रुरुमा  दलित बर्ग सचेतना कार्यक्रम  सम्पन्न

    रुरुमा दलित बर्ग सचेतना कार्यक्रम सम्पन्न

    चुरामणि तिमिल्सिना ।
    रुरुक्षेत्र गाउँपालिका गुल्मीमा दलित बर्ग सचेतना कार्यक्रम सम्पन्न भएको छ ।

    रुरु क्षेत्र गाउँपालिका गुल्मीको आयोजनमा कार्यक्रम गरिएको हो । समापन समारोहमा अध्यक्ष यदु ज्ञवाली उपाध्यक्ष मिनादेबी गौतम र सामाजिक बिकास समिती संयोजक शेष नारायण पौडेल लगाएतले मन्तव्य राख्नुभएको थियो ।

    कार्यक्रममा दुर्गा घायलले जातिय बिभेदको पृष्ठभुमि , दलित आन्दोलनको पृष्ठभुमि, दलितहरुको राजनैतिक सामाजिक आर्थिक धार्मिक अबस्था र स्थानीय तहले खेल्न सक्ने भुमिका, प्रमुख प्रसासकिय अधिकृत मधुकृष्ण पौडेल, हेम बहादुर कार्की र दामोदर ज्ञवालीले संबिधानमा दलित अधिकार र कानुनी ब्यबस्था,बिधायन समिती संयोजक तथा रुरु ४ कि दलित महिला सदस्य ममता आत्रेय सुनारले न्यायिक समिती र राष्ट्रिय दलित आयोगको काम कर्तव्य र अधिकारका बिषयमा प्रशिक्षण दिनुभएको थियो ।

    कार्यक्रममा सहभागीता जनाएका सहभागीले यो कार्यक्रम प्रभाव कारी भएको भन्दै आगामी दिन्हरुमा टोल बस्ती हरुमा पनि यस्तै कार्यक्रम सन्चालन गर्न आग्रह गर्दै हरेक तह र तप्का बाट दलित कार्यक्रमहरु लाई बजेट निर्माण गर्न समेत आग्रह गरेका थिए ।

  • वर्षाका कारण मुलुकभरका विभिन्न विमानस्थलहरूमा उडान प्रभावित

    वर्षाका कारण मुलुकभरका विभिन्न विमानस्थलहरूमा उडान प्रभावित

    काठमाडौं ।
    मंगलबार बिहानैदेखि भारी वर्षा भएका कारण मुलुकभरका विभिन्न विमानस्थलहरूमा उडान प्रभावित भएका छन् ।

    त्रिभुवन अन्तर्राष्ट्रिय विमानस्थलका अनुसार भारी वर्षाका कारण समयमै उडान हुन नसकेका हुन्।

    विमानस्थलका अनुसार लुक्ला, पोखरा, धनगढी, नेपालगन्ज, भैरहवा, सुर्खेत, तुम्लिङटार, भद्रपुर विमानस्थलमा उडान डिले भएको हो।

    काठमाडौं विमानस्थलममा आइएफआर उडान भइरहेको विमानस्थल कार्यालयले जनाएको छ।

    केहीबेर अघि भद्रपुरमा उडान शुरू भएको विमानस्थल कार्यालयले जानकारी दिएको छ।

    काठमाडौंको मौसम राम्रो भए पनि अन्य गन्तब्यहरूमा मौसममा खराबी आउँदा उडान समयमै हुन नसकेको विभानस्थलले जानकारी दिएको छ।

    हाल देशभर मनसुनी वायुको प्रभाव रहेको छ ।

  • बिहानैदेखि परेको वर्षाले सिद्धार्थ राजमार्ग अवरुद्ध

    बिहानैदेखि परेको वर्षाले सिद्धार्थ राजमार्ग अवरुद्ध

    पाल्पा ।
    मंगलबार बिहानैदेखि परेको वर्षाले सिद्धार्थ राजमार्ग अवरुद्ध भएको छ ।

    राजमार्गको तानसेन–वुटवल सडक खण्ड अन्तर्गत तिनाउ गाउँपालिका–३, सिद्धबाबा क्षेत्रमा दर्जन बढी पहिरो खसेर सडक अवरुद्ध भएको स्थानीय विष्णुप्रसाद पाण्डेयले जानकारी दिए ।

    अविरल वर्षासँगै दोभान प्रहरी चौकीदेखि चिडियाखोलासम्म सिद्धार्थ राजमार्गको ठाउँठाउँमा पहिरो खसेको छ । वर्षा नरोकिएकाले पहिरो पन्छाउन नसकिएको दोभान प्रहरीले जनाएको छ ।

    ‘वर्षा हुँदाहुँदै पहिरो पन्छाउन सकिने अवस्था छैन,’ दोभान प्रहरी चौकी प्रमुख विष्णुबहादुर कुँवरले भने, ‘रोकिएपछि पहिरो पन्छाइनेछ ।’ ठूलो पानी परेकाले पहिरो पन्छाउन केही समय लाग्ने उनले बताए ।

    प्रहरीले बुटवलतर्फबाट आउने सवारी साधनलाई तल्लो सिद्धबाबा क्षेत्रमा र तानसेनतर्फबाट बुटवल हिँडेका सवारी साधनलाई दोभान प्रहरीचौकीबाट जान दिएको छैन ।

    केही दिनयता दोभानदेखि सिद्दबाबा क्षेत्रमा दिनहुँ खस्ने समस्या बढेको छ ।

    सिद्दार्थ राजमार्ग अवरुद्ध हुँदा बुटवलबाट पोखरा, स्याङजा, गुल्मी, अर्घाखाँची, बाग्लुङसम्म जाने यात्रु साथै र त्यसतर्फवाट बुटवलतर्फ जाने सवारी साधन र यात्रु बाटोमै अलपत्र छन् ।