Category: देश/प्रदेश

  • तीजमा चेलीबेटी दर खान व्यस्त, अर्गलीका भट्टराई परिवार भने मकै छोडाउने सुकाउनै व्यस्त

    तीजमा चेलीबेटी दर खान व्यस्त, अर्गलीका भट्टराई परिवार भने मकै छोडाउने सुकाउनै व्यस्त

    चुरामणि तिमिल्सिना रिडी भदौ १०

    पाल्पा जिल्ला तानसेन नगरपालिका वडा नम्बर १४ अर्गली पुजारी गाउँका कृषक तथा सामाजिक अभियन्ता गीता भट्टराई भन्छिन् – “सबै दिदीबहिनी माइत गएका छन्, मेरा पनि नन्द–अमाजु माइत आएका छन्। तर, म भने मकैको चटारोले गर्दा घरमै व्यस्त भएँ।”

    गीता भट्टराई र उनका श्रीमान् अच्युत भट्टराईलाई यसपालि तीज पर्वले खासै छोएन। बारीभरि, दलानभरि र ढिकाभरि सुकाउन राखिएका मकै व्यवस्थापनमै उनीहरू व्यस्त छन्।

    अच्युत भट्टराईका अनुसार मौसमअनुसारको खेतीपाती गर्दा खाद्यान्नको कमी छैन। यस वर्ष मात्र ४५ मुरीभन्दा बढी मकै उत्पादन भएपछि हातैले मात्र सम्भव नभएकाले उपकरण प्रयोग गरी सुकाउने काम भइरहेको छ।

    “सबैजना दर खाने काममा व्यस्त छन्, हामी भने कामसँगै परिवारले सन्तुलन मिलाउँदै रमाइलो गर्छौँ,” गीता भट्टराई भन्छिन्। गाउँभरि तीजका गीत गुञ्जिरहे पनि भट्टराई परिवार भने मकै व्यवस्थापनमै व्यस्त छ।

    प्रत्येक वर्ष मकैबाट राम्रो आम्दानी गर्दै आएका भट्टराई दम्पतीले यस वर्ष पनि उस्तै आशा राखेका छन्। उनीहरू भन्छन्– “पर्व नमान्दा पनि हामी उत्पादन र आम्दानीमै सन्तुष्ट छौँ।” यति मात्रै होइन गीता भट्टराईका श्रीमान अच्युत भट्टराई बिहान कलेज पढाउन व्यस्त हुनुहुन्छ दिउँसो विद्यालय जान यस्तै गीता भट्टराई लाई सामाजिक काम भनेपछि हुरुक्कै हुने प्रवृत्तिले गर्दा अझै घरधन्दामा समय कम दिँदा पनि यसरी उत्पादन भएको देख्दा आफूहरू खुसी भएको बताउनुहुन्छ

  • रिब्दिकोटमा अकबरे खुर्सानीको धमाका : बारीभरि राताम्य, करोडौंको कारोबार”

    रिब्दिकोटमा अकबरे खुर्सानीको धमाका : बारीभरि राताम्य, करोडौंको कारोबार”

     

     

    चुरामणि तिमिल्सिना रिडी   भदौ  २

    पाल्पाको रिब्दिकोट गाउँपालिकाका किसानहरू अहिले अकबरे खुर्सानी टिपेर संकलन केन्द्रसम्म पुर्‍याउन भ्याइनभ्याइ व्यस्त भएका छन्। आर्थिक वर्ष २०७६ सालदेखि शुरु गरिएको “अकबरे खुर्सानी कार्यक्रम” अहिले गाउँपालिकाभरि सफल बनेको छ।

    गाउँपालिकालाई ‘खुर्सानीको हब’ बनाउने उद्देश्यका साथ तत्कालीन अध्यक्ष नारायणबहादुर जिसीको नेतृत्वमा २०० रोपनीबाट सुरु भएको यो कार्यक्रम अहिले बढेर करिब १३०० रोपनीमा फैलिएको छ। पूर्व अध्यक्ष जिसीका अनुसार विगतमा ५ करोडभन्दा बढीको कारोबार भएको यो खुर्सानी व्यवसायले यस वर्ष करिब ८ करोड रुपैयाँभन्दा माथिको कारोबार गर्ने अनुमान गरिएको छ।

    साना किसानलाई समेत तालिम, प्रशिक्षण र प्राविधिक सहयोग उपलब्ध गराएर सुरु गरिएको यो अभियानले अहिले बस्तीबस्ती, टोलटोल र बजारछेउछेउमा समेत उत्पादन बढाएको छ। खुर्सानी टिपेर बिक्री गरेका किसानहरू दैनिक घरायसी खर्च धान्न सफल भएका छन्।

    हाल पाल्पा, बुटवल, स्याङ्जा, भैरहवा, चितवनका साथै केही विदेशी बजारसम्म समेत रिब्दिकोटको खुर्सानी आपूर्ति भइरहेको छ। ठूला चाउचाउ उद्योगदेखि मसलाको पाउडर उत्पादन गर्ने कम्पनीहरूले समेत यहाँको अकबरे खुर्सानीलाई प्राथमिकता दिँदै आएका छन्।

    संकलन केन्द्र हार्थोकमा स्थापना गरिएको छ भने त्यहाँबाट यातायात मार्फत विभिन्न स्थानमा पठाइने गरिएको छ। उद्योगहरूको अत्यधिक मागका कारण किसानहरूले उत्पादन धान्नै नसक्ने अवस्थामा पुगेको स्थानीय व्यापारीहरूको भनाइ छ।

    “खुर्सानीबाट पनि ठूलो आम्दानी गर्न सकिन्छ भन्ने कुरा किसानहरूले अहिले मात्र व्यवहारमै अनुभव गरेका छन्। यसले रिब्दिकोटलाई खुर्सानी उत्पादनको केन्द्रका रूपमा स्थापित गरिदिएको छ,” पूर्व अध्यक्ष जिसीले भन्नुभयो।यता, वर्तमान अध्यक्ष नारायणबहादुर कार्कीले समेत किसानका कार्यक्रमलाई निरन्तरता दिँदै, उत्पादन र बजार व्यवस्थापनमा सहयोग गर्ने आश्वासन दिनुभएको छ।

  • कोटिहोममा सञ्चारकर्मीलाई सम्मान

    कोटिहोममा सञ्चारकर्मीलाई सम्मान

    कोटिहोममा सञ्चारकर्मीलाई सम्मान

    पोखरा । पोखरामा जारी श्री गण्डकी शतकुण्डीय गायत्री कोटिहोम विराट ज्ञान महायज्ञमा सञ्चारकर्मीलाई सम्मान गरिएको छ ।

     

    कोटिहोमको प्रचार प्रसारमा महत्त्वपूर्ण योगदान दिएको कदर स्वरूप १ सय बढी सञ्चारकर्मीलाई सम्मान गरिएको महायज्ञ प्रचार प्रसार संयोजक लेखराज ढकालले जानकारी दिए । उनका अनुसार देशभर बाट आउने सञ्चारकर्मीलाई सम्मान गर्ने कार्यक्रम जारी रहेको छ ।

     

    महायज्ञका सङ्कल्पकर्ता बालयोगेश्वर श्री विजय कृष्णमूर्तिजी महाराज श्रीमद्भागवत कथा प्रवक्ता एवम् वरिष्ठ ज्योतिषविद् हरिशरण शास्त्री, महायज्ञ मूल आयोजक समितिका सहसंयोजक गंगाधर पराजुलीले सञ्चारकर्मीलाई कदर पत्र दोसल्ला ओढाई सम्मान गरेका हुन्।

    सम्मान कार्यक्रममा सम्मानित भएपछि सञ्चारकर्मीले कोटिहोमको सम्मानले आफूहरूलाई थप उर्जा प्रदान भएको बताउँदै कोटिहोमको प्रचार प्रसारमा आफूहरूको तर्फबाट सक्दो सहयोग गर्ने प्रतिबद्धता जनाएका थिए ।

     

    महायज्ञका सङ्कल्पकर्ता बालयोगेश्वर श्री विजय कृष्णमूर्तिजी महाराजले आम सञ्चारकर्मीको सकारात्मक सन्देशले नै कोटिहोमले सफलता पाएको बताए ।

    कोटिहोममा प्रख्यात साधु सन्तको प्रवचन र नेपालका ख्याति प्राप्त कलाकारको प्रस्तुति रहेको छ ।

    कोटिहोममा चौरासी पूजन कार्यक्रम, सवा करोड पार्थिव शिवलिंगको निर्माण गरी भगवान् शिवको आशीर्वाद प्राप्त  गर्ने महत्त्वपूर्ण कर्म, १८ पुराण, ४ वेद र १०८ श्रीमदभागवत पाठ पारायण श्रवण साथै वेद, पुराण र भागवत मध्ये कुनै एकको कर्ता बन्ने अवसर, भूमि पूजनका लागि आफ्नो घरमा जमिनको एक मुठी माटो ल्याइ भूमि पूजन जस्तो महत्त्वपूर्ण कर्ममा सहभागी हुने व्यवस्था रहेको छ ।

     

    त्यसै गरी पितृ उद्धार, पारिवारिक सुख, शान्ति, सु–स्वास्थ्य र समृद्धिका लागि आफ्नो घर परिवार तथा आफ्ना पितृहरूको नाममा २१ कोटि दीप प्रज्वलन गर्ने, तुला दान कर्मका लागि आफ्ना पूजनीय आमाबुवाहरूलाई तुला दानका लागि कोटिहोम स्थलमा सहभागी गराउने,  वैवाहिक जीवनमा जोडिन इच्छुक सबैलाई शुभ विवाह कार्यक्रम, रुद्राभिषेक महा अनुष्ठान, अति रुद्री, लुघुरुद्री आदि पुण्यमयी कर्ममा सहभागी हुने व्यवस्था रहेको छ ।

     

    कोटिहोममा ४ सय बढी व्रामणले दैनिक भगवानको नाममा आहुति अर्पण गरिरहेका छन्। पावन भूमिमा आयोजित १ सय कुण्डीय कोटिहोमको हवन कुण्डका लागि जौ, तिल, घिउ आदि हवन सामग्री दान गर्ने र हवन कुण्ड परिक्रममा गर्ने व्यवस्था रहेको मानव सेवा फाउन्डेसनका व्यवस्थापक विष्णु थापाले जानकारी दिए ।

     

    कोटिहोममा जेठ १४ देखि २२ गतेसम्म प्रसिद्ध कथा वाचिका राधिका दासी, श्रीराम कथा वाचिका देवी चन्द्रकला सखी, दार्शनिक प्रवचनकर्ता चैतन्यकृष्ण महाराज सहभागी हुने महायज्ञ मूल आयोजक समितिका सह निर्देशक युवक लामिछानेले जानकारी दिए ।

     

    कार्यक्रममा राष्ट्रिय तथा अन्तर्राष्ट्रिय स्तरमा ख्याति प्राप्त कलाकारहरूबाट भजन, झाँकी, देव लीला, नृत्य लगायत प्रस्तुति रहेका छन् । पोखरा १७ स्थित सदाशिवजी सिद्देश्वर हरिहर मन्दिरको जग्गा र आसपासका स्थानीयको जग्गामा कोटिहोम सञ्चालन भएको छ । कोटिहोम जेठ २६ गतेसम्म सञ्चालन हुने छ ।

  • ब्राजिलमा विमान दुर्घटना: सबै यात्रुको मृत्यु

    ब्राजिलमा विमान दुर्घटना: सबै यात्रुको मृत्यु

    श्रावण २६

    साओ पाउलो: २०२४ अगस्ट ९ मा ब्राजिलको साओ पाउलो राज्यको विन्हेदो नगरपालिकामा भएको विमान दुर्घटनामा ६१ जनाको मृत्यु भएको छ। यो दुर्घटना ब्राजिलियन एयरलाइन वोएपासको एटीआर ७२-५०० विमानले कास्काभेलबाट ग्वारूलहस अन्तर्राष्ट्रिय विमानस्थल जाँदै गर्दा भएको हो।

    दुर्घटनापछि विमानलाई आगो लागेको र ठूलो धुवाँको मुस्लो देखा परेको थियो। उद्धारकर्मीहरू घटनास्थलमा पुगे पनि सबै यात्रु र चालक दलका सदस्यको मृत्यु भइसकेको थियो। विमानमा ५८ यात्रु र ३ चालक दलका सदस्य सवार थिए।

    ब्राजिलका राष्ट्रपति लुइज इनासियो लुला दा सिल्भाले यो घटनाप्रति गहिरो दुःख व्यक्त गर्दै शोक मनाउनका लागि एक मिनेटको मौनधारण गर्न आग्रह गरेका थिए। दुर्घटनाको कारण भने हालसम्म पत्ता लाग्न सकेको छैन, र यसबारे अनुसन्धान भइरहेको छ।

    यो दुर्घटना ब्राजिलको हालसम्मकै ठूला हवाई दुर्घटनामध्ये एक मानिएको छ, जसले देशभर शोकको वातावरण सिर्जना गरेको छ।

     

  • कार्यसम्पादनमा जिप्रका गुल्मी  सर्वोत्कृष्ट

    कार्यसम्पादनमा जिप्रका गुल्मी सर्वोत्कृष्ट

    गुल्मी ।
    गत वर्ष तेस्रो नम्बरमा रहेको गुल्मी यसपटक ९७.७५ प्रतिशत अंक प्राप्त गरी जिल्ला प्रशासन कार्यालयहरुमा सवोत्कृष्ट भएको हो ।

    बिहीबार मूल्यांकन समितिका संयोजक प्रमुख भीष्मकुमार भुसाल र प्रशासन महाशाखाका प्रमुख टेकबहादुर केसीले बुझाएको अध्ययन प्रतिवेदनअनुसार कार्यसम्पादनमा मुल्याङकनमा गुल्मीलाई देशैभरीका जिल्ला प्रशासन कार्यालयहरु मध्ये सर्वोत्कृष्ट ठहराएको हो ।

    कार्यसम्पादन मूल्यांकनमा सर्वोत्कृष्ट अंक प्राप्त गर्ने जिल्ला प्रशासन कार्यालय गुल्मीको प्रमुख जिल्ला अधिकारीको जिम्मेवारीमा सहसचिव पुण्यविक्रम पौडेल रहनुभएको छ । गृह मन्त्रालयले प्रमुख जिल्ला अधिकारीहरुसँग गरेको कार्यसम्पादन सम्झौताको आधारमा कार्यान्वयनको अवस्थाको मूल्यांकन गरेर बर्षै पिच्छे गृह मन्त्रालयले नतिजा सार्वजनिक गर्दै आएको छ ।

    सो समितिले शान्ति सुरक्षा, अपराध नियन्त्रण, सुशासन र सेवा प्रवाह,लागूऔषध नियन्त्रण, विपद् जोखिम न्यूनीकरण तथा व्यवस्थापन, मुआब्जा वितरण र विकास निर्माणमा समन्वय तथा आर्थिक प्रशासनसमेत गरी ६८ वटा परिसूचकहरूलाई मुल्यांकनलाई आधार मानी प्रत्येक बर्ष प्रतिवेदन तयार गर्दैैै आएको छ ।

    जसअनुुसार ९७ प्रतिशत अंकसहित अर्घाखाँची प्रशासन दोस्रो, नवलपरासीपूर्व प्रशासन ९६.७५ प्रतिशतसहित तेस्रो स्थानमा रहन सफल भएका छन भने रूकुम पश्चिम प्रशासन ९६.५ सहित चौंथो नम्बरमा परेको छ ।

    यसैगरी, हुम्ला जिल्ला प्रशासन पाँचौं नम्बरमा पर्न सफल भएको छ भने हुम्लासँगै समान ९५ प्रतिशत अंक नै पाएको डडेलधुरा पनि पाचौं स्थानमा रहन सफल भएको गृह मन्त्रालयले जनाएको छ।

  • सरकारले छापामार शैलीमा निर्वाचनको मिति घोषणा गर्यो :एमाले उपाध्यक्ष नेम्वाङ

    सरकारले छापामार शैलीमा निर्वाचनको मिति घोषणा गर्यो :एमाले उपाध्यक्ष नेम्वाङ

    बुटवल ।
    नेकपा (एमाले)का उपाध्यक्ष सुवास नेम्वाङले सरकारले छापामार शैलीमा निर्वाचनको मिति घोषणा गरेको बताएका छन् ।

    उनले संसदीय पद्धति र परम्परामा निर्वाचन घोषणाजस्तो महत्त्वपूर्ण कुरामा प्रमुख प्रतिपक्षसँग सल्लाह नगरी निर्णय नहुने भए पनि सरकारले प्रमुख प्रतिपक्षसँग कुनै सल्लाह नगरी निर्वाचनको घोषणा गरेको बताए ।

    प्रेस चौतारी रुपन्देहीले बिहीबार बुटवलमा आयोजना गरेको पत्रकार सम्मेलनमा बोल्दै उपाध्यक्ष नेम्वाङले नागरिक दबाब र एमालेको माग थेग्न नसकेर सरकारले छापामार शैलीमा निर्वाचनको घोषणा गरे पनि एमाले खुसी भएको स्पष्ट पारे ।

    उनले मंसिर ४ गते निर्वाचनमा सम्पूर्ण बहिखाता बोकेर निर्वाचनमा जाने बताए ।‘एमाले सम्पूर्ण बहिखाता बोकेर जनतामा जान्छ,’उनले भने,‘निष्पक्ष, भयरहित निर्वाचन गराउने विषयमा एमालेको सरकारलाई सहयोग रहने छ ।’

    उपाध्यक्ष नेम्वाङले एमालेको आधिकारिक धारणा संघीयता, गणतन्त्र, धर्मनिरपेक्षता, समानुपातिक र समावेशी नै रहेको बताए ।

    अहिलेको गठबन्धन सरकार दूषित रहेको टिप्पणी गर्दै उनले संसारभर चलेको संसदीय मूल्यमान्यताविपरीत नेपालमा सत्तापक्षले प्रमुख प्रतिपक्षका विरुद्ध घेराबन्दी गरिरहेको बताए ।

  • प्रतिनिधि र प्रदेश सभाको चुनाव मङ्सिर ४ गते एकै चरणमा हुने

    प्रतिनिधि र प्रदेश सभाको चुनाव मङ्सिर ४ गते एकै चरणमा हुने

    काठमाण्डौ ।
    सरकारले प्रतिनिधि सभा र प्रदेश सभाको चुनाव मङ्सिर ४ गते आइतवार गर्ने निर्णय गरेको छ ।

    प्रधानमन्त्री निवास बालुवाटारमा बसेको मन्त्रिपरिषद्को बैठकले मङ्सिर ४ गते देशैभर एकै चरणमा चुनाव गर्ने निर्णय गरेको भूमि व्यवस्था, सहकारी तथा गरिबी निवारण मन्त्री शशी श्रेष्ठले जानकारी दिनुभयो ।

    सत्ता गठबन्धनको हिजो बुधवार बसेको बैठकले आउँदो मङ्सिर ४ गते प्रदेश र प्रतिनिधि सभा सदस्यको चुनाव एकै चरणमा गर्ने गरी सहमति जुटाएको थियो ।

    मन्त्रिपरिषद्को बैठकपछि सञ्चरकर्मीसँग कुरा गर्दै सरकारका प्रवक्ता एवम् सञ्चार तथा सूचना प्रविधिमन्त्री ज्ञानेन्द्रबहादुर कार्कीले प्रतिनिधि सभाको कार्यकालको विषयमा अहिले सरकारमा छलफल भइरहेको र प्रतिनिधि सभाका सदस्य,सभामुख,उपसभामुखले चुनावका निम्ति निर्वाचन आयोगमा
    गएर आफ्नो उम्मेदवारीको मनोनयन गरेपछि स्वतः प्रतिनिधि सभाको कार्यकाल समाप्त हुने बताउनुभयो ।

  • लुम्बिनी प्रदेशसभाको चालू दशौं अधिवेशन अन्त्य

    लुम्बिनी प्रदेशसभाको चालू दशौं अधिवेशन अन्त्य

    बुटवल ।
    लुम्बिनी प्रदेशसभाको चालू दशौं अधिवेशन अन्त्य गरिएको छ ।

    प्रदेशसभा सचिवालयले साउन ८ गतेका लागि बैठक बोलाएको थियो तर शुक्रबार अबेर मन्त्रिपरिषद्को निर्णय भन्दै प्रदेश प्रमुखको कार्यालयले प्रदेश सभा अन्त्य गरिएको जानकारी दिएको छ । नेपालको संविधानको धारा १८३ को उपधारा २ बमोजिम शुक्रवार राती १२ बजेदेखि चालु अधिवेशन अन्त्य गरिएको प्रदेश प्रमुखको कार्यालयले जारी गरेको विज्ञप्तीमा जनाइएको छ ।

    प्रवक्ता चिरञ्जीवी पौडेलले जारी गरेको विज्ञप्तीमा मन्त्री परिषादको निर्णयअनुसार प्रदेश प्रमुख अमिक शेरचनले प्रदेश सभाको अन्त्य गरेको जनाईएको छ ।

  • एसईईको नतिजा सोमबार प्रकाशन हुने

    एसईईको नतिजा सोमबार प्रकाशन हुने

    काठमाडौं ।
    यस वर्षको माध्यमिक शिक्षा परीक्षा (एसईई) को नतिजा सोमबार प्रकाशन गर्ने राष्ट्रिय परीक्षा बोर्डले जनाएको छ । बोर्डले अन्तिम तयारी गरेकाले सोमबार नजिता प्रकाशन गर्ने अध्यक्ष डा महाश्रम शर्माले जानकारी दिनुभयो ।

    उत्तरपुस्तिका परीक्षणको काम सम्पन्न गरी संपरीक्षणको कामसमेत अन्तिम चरणमा पुगेकाले कम्प्युटर इन्ट्री गर्ने, रुजु गर्नेलगायतका काम सकिने क्रममा रहेको बोर्डले जनाएको छ ।

    प्राप्ताङ्क इन्ट्री गर्ने, मिस म्याच गर्ने र टेबुलेसन गर्ने काम भइरहेको जनाएको छ । दुई हजार सात परीक्षा केन्द्रबाट चार लाख ८८ हजार ७४२ परीक्षार्थीले परीक्षा दिएका छन् ।

  • लुम्बिनीको मायादेवी मन्दिर थाइ संस्थाले मर्मत गर्ने

    लुम्बिनीको मायादेवी मन्दिर थाइ संस्थाले मर्मत गर्ने

    बुटवल ।
    लुम्बिनीको मायादेवी मन्दिर थाइल्याण्डको बुद्धिष्ट संस्था थाइपुङ थाइले मर्मत गर्ने भएको छ ।

    वर्षौँदेखि पानी चुहिएर महत्त्वपूर्ण सम्पदा क्षति हुने क्रममा रहेकै समयमा मायादेवी मन्दिर मर्मतको काम सुरु हुन थालेको हो ।

    लुम्बिनी विकास कोषका अनुसार भदौबाट मर्मतको काम सुरु हुने भएको छ ।मन्दिर मर्मतका लागि कोषले प्राविधिक सहयोग गर्ने भएको छ ।

    लुम्बिनी विकास कोषका सदस्यसचिव सानुराजा शाक्यले पानी चुहिने भएपछि प्राचीन संरचना मक्किने,ढुसी लाग्ने,खिइने,धुलो बन्नेजस्ता समस्या
    रोक्न मर्मत गर्न थालिएको बताए । उनका अनुसार मर्मत खर्च थाइ संस्थाले नै व्यहोर्ने छ भने पुरातत्व विभागका इन्जियिरहरुले निगरानी गर्नेछन् ।

    लुम्बिनी विकास कोषको पुरातत्व महाशाखाका अनुसार मन्दिर चुहिन थालेको पाँच–छ वर्ष भएको छ ।
    त्यसअघि पनि पानी चुहिने समस्या भएको तर मर्मतपछि केही समय समस्या समाधान भए पनि फेरि उस्तै भएको महाशाखाले जनाएको छ ।

    कोषका योजना प्रमुख सरोज भट्टराईका अनुसार मन्दिर चुहिन थालेको १८ वर्ष अघिदेखि हो ।यो बीचमा दुई पटक मन्दिरको छतलाई वाटरप्रुफिङ(पानी चुहिन नदिन प्रविधिको प्रयोग गरी मर्मत) गरिएको उनले बताए ।

    अहिले मर्मत गर्नका लागि ७ करोड रुपैयाँ जति खर्च आउने अनुमान गरिएको छ ।