Category: धर्म सस्कृती

  • रिडीमा शोभा भागवती माताको परम्परागत रथयात्रा सम्पन्न

    रिडीमा शोभा भागवती माताको परम्परागत रथयात्रा सम्पन्न

     

    चुरामणि तिमिल्सिना  रिडी भदौ  १६

    रुरु क्षेत्रधाम रिडीमा रहेको शोभा भागवती माताको रथयात्रा निकालिएको छ। रिडी बजारस्थित भागवती मन्दिरको विभिन्न धार्मिक कार्यक्रम गरी परिक्रमा गराइएको थियो।

    स्थानीयवासी सुवर्णलाल कक्षपतिका अनुसार परम्परागत रूपमा सञ्चालन हुँदै आएको रथयात्रामा विगतका केही वर्षयता परिमार्जन गर्दै ल्याइएको छ

    । धार्मिक व्यक्तित्व जीवनकुमार कसजुले रिडी बजारमा रहेका मठमन्दिरहरूको वार्षिक विशेष पूजा, रथयात्रा र आपसी सद्भाव विकास गर्ने परम्परा निरन्तर रहँदै आएको जानकारी दिनुभयो।

    समाजसेवी चन्द्रलाल कसाजुले शोभा भागवती मन्दिर कसले कहिले स्थापना गर्यो भन्ने विषयमा प्रामाणिक तथ्य फेला नपरेको र खोज अनुसन्धान भइरहेको बताउनुभयो।

    रथयात्रामा बजारबासी, स्थानीय संघसंस्था, विद्यालय, महिला समूह, वित्तीय संस्था तथा सुरक्षा निकायको उल्लेखनीय सहभागिता रहेको थियो।

  • सनातन धर्मावलम्बी महिलाहरु आज उमामहेश्वरको व्रत तथा पूजा-आराधना गरी तीज पर्व मनाउँदै

    सनातन धर्मावलम्बी महिलाहरु आज उमामहेश्वरको व्रत तथा पूजा-आराधना गरी तीज पर्व मनाउँदै

    भदौँ-१०
    भाद्र शुक्ल तृतीया अर्थात् तीज पर्व सनातन धर्मावलम्बी महिलाहरु मंगलबार उमामहेश्वरको व्रत तथा पूजा-आराधना गरी मनाउँदैछन्।

     

    भाद्र शुक्ल तृतीयाका दिन बिहान सबेरै उठी स्नान गरी दिन भर व्रत बस्ने र उमामहेश्वरको आराधना गर्ने परम्परा रहेको छ।

    सत्ययुगमा हिमालय र मेनकाकी पुत्री पार्वतीले निराहार व्रत बसी कठिन तपस्या गरेको र महादेव पति पाएको पौराणिक सन्दर्भ छ। त्यसैले विधिपूर्वक व्रत बस्दा मनोकांक्षा सिद्ध हुने विश्वास गरिन्छ।

     

    सक्नेले दिनभर पानीसमेत नखाई व्रत बस्ने साँझ पौराणिक विधिले उमामहेश्वरको पूजा गर्ने, कथा सुन्ने विधान छ। धर्मशास्त्री प्रा.डा. रामचन्द्र गौतमले निराहार, जलाहार र फलाहार गरी व्रतका तीन किसिम रहेको बताउनु भयो। ‘सक्नेले निराहार, नसक्नेले जलाहार र जलाहार पनि नसक्नेले फलाहार व्रत बस्नु उत्तम हुन्छ’, उहाँले भन्नु भयो भोलिपल्ट सबेरै ‘लोापामुद्रा’लाई अर्घ्य दिए पछि तीजको व्रत पूर्ण भएको मानिन्छ।

     

    विवाहिताले पति र छोराछोरीको सुस्वास्थ्यको कामना गर्ने र अविवाहिताले असल पतिको कामनामा व्रत बस्ने परम्परा छ। अटल सौभाग्य र असल सन्तान प्राप्तिको कामना सहित विवाहितले तथा असल वर तथा वधुप्राप्तिका लागि अविवाहितले ​पनि तीजको व्रत बस्ने विधान रहेको धर्मशास्त्री ​प्राडा देवमणि भट्टराईले बताउनु भयो। व्रतलाई संकुचित अर्थमा लिन नहुने उहाँको भनाइ छ।

     

    आज काठमाडौंस्थित पशुपतिनाथ, गोकर्णेश्वर, ललितपुरको कुम्भेश्वर, सन्तानेश्वर, सिन्धुलीको कुशेश्वर, सिन्धुपाल्चोकको फटकेश्वर र दोलखाको भीमेश्वरलगायत देशभरका शिवालय मन्दिरमा श्रद्धालुको घुइँचो लाग्छ।

     

    तीजका लागि माइतीले चेलिबेटीलाई निम्तो गर्ने, सम्भव भएसम्म सबै दिदीबहिनी एकै थलोमा जम्मा हुने र अघिल्लो दिन बेलुकी ‘दर’ खाने चलन छ। वर्षभर घरव्यवहारमा भोगेका दुःखकष्ट सामूहिकरूपमा पोखेर उनीहरू नाचगान गर्छन्।पछिल्लो समय तीज मनाउने मौलिक परम्परा भने फेरिदैँ गएको छ।

  • पाल्पाको अर्गलीमा मौलिक तीज गीत प्रतियोगिता भाद्र ६ गते आयोजना हुँदै

    पाल्पाको अर्गलीमा मौलिक तीज गीत प्रतियोगिता भाद्र ६ गते आयोजना हुँदै

    अर्गलीमा मौलिक तीज गीत प्रतियोगिता २०८२ भाद्र ६ गते हुने

    चुरामणि तिमिल्सिना भाद्र २ रिडी

    तानसेन नगरपालिका–१४ अर्गालीस्थित शैलोच्य इङ्गलिश बोडिङ स्कुलले महिलाहरूको महान पर्व हरितालिका तीजको अवसरमा यस वर्ष पनि मौलिक तीज गीत प्रतियोगिता २०८२ आयोजना गर्ने भएको छ। कार्यक्रम आगामी भाद्र ६ गते विद्यालय परिसरमा हुने विद्यालय व्यवस्थापन समितिका अध्यक्ष विष्णुप्रसाद रेग्मीले जानकारी दिनुभयो।

    गाउँ–टोलमा लुकेर रहेका मौलिक परम्परा, संस्कृति र कला उजागर गर्ने उद्देश्यले विद्यालयले विगतका वर्षहरूदेखि निरन्तर रुपमा यस्तो प्रतियोगिता गर्दै आएको छ। प्रतियोगिताले दिदीबहिनीलाई एकै स्थानमा भेला गराई दुःख–सुख साटासाट गर्ने अवसर समेत प्रदान गर्ने भएकोले यसको महत्व झनै बढेको विद्यालयका प्रिन्सिपल त्रैलोक्य न्यौपानेले बताउनुभयो।

    कार्यक्रममा विजेता समूहलाई नगद पुरस्कारसहित प्रमाणपत्र प्रदान गरिने आयोजकले जनाएको छ।

  • ठाडा बाटामा अवस्थित राधाकृष्ण मन्दिरको उद्घाटन हुँदै

    ठाडा बाटामा अवस्थित राधाकृष्ण मन्दिरको उद्घाटन हुँदै

    चुरामणि तिमिल्सिना   श्रावण ३१

    रुरु क्षेत्र–१ ठाडाबाटमा राधाकृष्ण मन्दिरको उत्घाटन आज हुदै

    गुल्मी, रुरु क्षेत्र गाउँपालिका–१ ठाडाबाटमा निर्माण गरिएको राधाकृष्ण मन्दिरकोआज कृष्ण जन्माष्टमीको दिन, भव्य समारोहका बीच विधिवत् रूपमा उद्घाटन हुने भएको छ।

    स्थानीय बासिन्दा, देश–विदेशमा रहेका दाजुभाइ तथा दिदीबहिनीहरू, र स्थानीय सरकारको आर्थिक सहयोगमा मन्दिर निर्माण गरिएको राधाकृष्ण मन्दिर व्यवस्थापन समितिका अध्यक्ष चेतबहादुर क्षेत्रीले जानकारी दिनुभयो। मनकामना आधारभूत विद्यालयको खाली जग्गामा यो मन्दिर निर्माण गरिएको हो। विद्यार्थी संख्या अत्यन्त कम भएपछि विद्यालयलाई अन्यत्र स्थानान्तरण गरी उक्त परिसरमा मन्दिर निर्माण गरिएको हो।

    व्यवस्थापन समितिका सचिव गोविन्द ज्ञवालीका अनुसार बिहान भगवान श्रीकृष्णलाई विधिसम्मत रूपमा कालीगण्डकी स्नान मन्दिरमा प्रतिष्ठापना गरी बाजागाजा, भजन–कीर्तन र पाठ–पारायणसहित उद्घाटन गरिनेछ।

    कोषाध्यक्ष बिन्दु सुवेदीका अनुसार गाउँमा विभिन्न मन्दिर भए पनि राधाकृष्णको मन्दिर नहुँदा यस्ता धार्मिक पर्वमा टाढासम्म दर्शन गर्न जानुपर्ने बाध्यता हटाउन यो मन्दिर निर्माण गरिएको हो। स्थानीयको दाबीअनुसार यस आसपासमा राधाकृष्णको यो मात्र मन्दिर हो।

    व्यवस्थापन समितिले उद्घाटन पछी प्रमुख आर्थिक सहयोगी, जिन्सी सामाग्री दाताहरूलाई सम्मान गर्ने कार्यक्रमसमेत तय गरेको छ। मन्दिर निर्माण गर्ने कार्यक्रम २०७४ सालमा भएपनि आर्थिक अभावकै कारणले मन्दिर पूर्ण हुन नसकेकोले अहिले आर्थिक सहयोग जुटाएर निर्माण कार्य सम्पन्न गरिएको हो। आज दिनभरि पन्चेबाजा यस्तै थोर्गेलि भजन किर्तनको टिम लगायतको टोलीले प्रस्तुति प्रस्तुत रहने छ ।

  • होमस्टे समितिको अध्यक्षमा पाल्पाका बस्याल निर्बाचित

    होमस्टे समितिको अध्यक्षमा पाल्पाका बस्याल निर्बाचित

    पाल्पा   श्रावण   २९

    तानसेन होमस्टे समिति पाल्पा (Homestay Association of Tansen – HAT) को अध्यक्ष पदमा तानसेन–३ का धनिश्वर बश्याल निर्वाचित हुनुभएको छ ।

    बश्यालले २०६७ सालदेखि तानसेनमा होराइजन होमस्टे मार्फत पाल्पाको पर्यटन प्रवर्धनमा बिशेष टेवा पु¥याउँदै आउनुभएको छ ।

    उहाँले सेवा सुरू गरेको ४ वर्ष पछि नेपालका उत्कृष्ट २५ सेवा प्रदायक होटल तथा होमस्टेको सुचीमा दोश्रो उपाधि सहित अन्तराष्ट्रिय अवार्ड प्राप्त गर्नुभएको थियो ।

    सो उपलब्धि पश्चात बश्यालले गुणस्तरीय सेवामा विश्वास राख्नुहुन्छ । बश्याल होमस्टे महासंघ नेपालको केन्द्रिय उपाध्यक्ष विदेश विभाग प्रमुख तथा लुम्बिनी प्रदेश इन्चार्जको जिम्मेवारीमा समेत रहनुभएको छ । तानसेनको पर्यटक प्रवर्धनमा बस्यालले खेल्नुभएकोे भूमिका उल्लेखनीय रहेको उच्च मुल्यांकन सहित तानसेन नगर प्रज्ञा प्रतिष्ठानले तानसेनका उत्कृष्ट २५ उद्यमीका रूपमा बस्याललाई सम्मान गरेको थियो ।

    २०७६ सालमा स्थापित HAT को नेतृत्व तेश्रो अधिवेशनसम्म होमस्टे व्यवसायी मनमोहन श्रेष्ठले गर्नुभएको थियो । २०६७ सालमा नेपाल सरकारले होमस्टे अवधारणा ल्याएको थियो । वर्तमान अवस्थामा पर्यटकहरू का माझ होमस्टे अवधारणा लोकप्रिय हुँदै गएको छ भने यो अवधारणाले आफैमा स्वरोजगारी प्रदान तथा नेपालका हरेक भूभागमा पर्यटनको पहुँच पुगेको बश्यालको भनाई
    छ ।

    उहाँ होमस्टे प्रवद्र्धनमा देशका विभिन्न स्थानमा तालिम सहजकर्ताको रूपमा सक्रिय छन। तानसेनको भगवतीतटोलमा विगत १५ वर्ष देखि संचालित होमस्टेको कारणले तानसेनमा आन्तरिक तथा बाह्य पर्यटक को आगमनमा वृद्धि भएको तानसेनका पर्यटन जानकारहरु बताउँछन् ।

    नयाँ जिम्मेवारीले आफूलाई थप जिम्मेवारीबोधका साथै आगामी समयमा थप परिणाम डेलिभरी गर्नुपर्ने उत्तरदायित्व आफ्नो काँधमा आएको महसुस भएको साथै आफ्ना केन्द्रिय जिम्मेवारी हरुका सबै नेटवर्कलाई तानसेनको पर्यटन सँग जोड्ने योजना रहेको अध्यक्ष बस्यालले बताउनुभयो ।

  • रामनदी धाम संस्कृत गुरुकुल: संस्कृत शिक्षाको उज्यालो भविष्यतर्फको पाइला

    रामनदी धाम संस्कृत गुरुकुल: संस्कृत शिक्षाको उज्यालो भविष्यतर्फको पाइला

    राम नदी धाम संस्कृत गुरुकुल: संस्कृत शिक्षाको उज्यालो भविष्यतर्फको पाइला

    चुरामणि तिमिल्सिना  रिडी असार ९

    पाल्पा र स्याङ्जाको संगमस्थल राम नदी धाममा रहेको राम नदी धाम संस्कृत गुरुकुल वि.सं. २०७६ सालदेखि सञ्चालनमा आएको हो। कक्षा ६ देखि कक्षा १० सम्म गुरुकुलमार्फत शिक्षण सिकाइ हुँदै आएको छ।अब यशलाई कक्षा वृद्धि समेत हुने विद्यालय व्यवस्थापन समितिका अध्यक्ष बिष्णु देवानन्द सरस्वती महाराजले जान्कारी दिनु भयो । उहाँका अनुसार यहाँ संस्कृत शिक्षासँगै अंग्रेजी, विज्ञान, कम्प्युटर, भाषा, वेद, कर्मकाण्ड, र दैनिक कौमुदी जस्ता विषयहरूको समेत अध्ययन–अभ्यास गराइन्छ।

    गुरुकुलका प्रधानाध्यापक कृष्णप्रसाद बस्यालका अनुसार बटुकहरूका लागि सुविधा सम्पन्न छात्रावास, पाकशाला, शुद्ध खानेपानी, आवश्यक पुस्तकालयजस्ता आधारभूत पूर्वाधारको कुनै कमी छैन। पाल्पा, गुल्मी, स्याङ्जा, कपिलवस्तु पर्वत नवलपरासी लगायतका जिल्लाबाट आएका ११७ जना बटुकहरू यहाँ आवासीय रूपमा रही अध्ययनरत छन्।

    गुरुकुलका आवासीय शिक्षक दीपक गैरेका अनुसार पहिलेको तुलनामा अहिलेका युवा अभिभावकहरूले संस्कृत शिक्षाको महत्व बुझेका छन् र आफ्ना बालबालिकालाई गुरुकुलमा पठाउन थालेका छन्। यहाँ अध्ययन गर्ने बटुकहरूलाई व्यवहारिक अभ्यास गराउने कामसमेत हुँदै आएको छ। विज्ञान विषय लिने बटुकहरूका लागि विज्ञान प्रयोगशालाको समेत स्थापना गरिएको छ। गुरुकुल बिदा भएको समयमा बटुकहरू गाउँघरमा हुने पूजापाठ तथा कर्मकाण्डमा व्यवहारिक अभ्यासका लागि जान्छन्।

    गल्याङ नगरपालिकाले गुरुकुलको सञ्चालनमा आर्थिक तथा आवश्यक सहयोग पुर्‍याइरहेको छ। नगरप्रमुख गुरुप्रसाद भट्टराईले यो गुरुकुललाई गल्याङ नगरपालिकाको गहनाको रूपमा उल्लेख गर्दै यसलाई अझ प्रभावकारी रूपमा सञ्चालन गर्न संघीय, प्रदेश र स्थानीय सरकारको समन्वयमा सहयोग जुटाइने प्रतिबद्धता व्यक्त गर्नुभयो।

    नगर प्रमुख भट्टराईले भन्नुभयो, “गाउँघरमा कर्मकाण्ड हराउँदै गएको अवस्थामा यो गुरुकुलको स्थापना भयो, जसले गाउँको मुहार नै परिवर्तन गरिदिएको छ। कलिला बटुकहरूद्वारा गरिने शुद्ध उच्चारण, लययुक्त भाषा प्रयोग तथा विधिपूर्वक गरिने पूजापाठले सबैलाई प्रभावित पारिरहेको छ।”

    त्यस्तै, नगरपालिकाकी उपप्रमुख हेमा न्यौपाने तिमल्सिनाले समय–समयमा गुरुकुलको अनुगमन गर्दा आफूलाई आनन्दको अनुभूति हुने गरेको बताउँदै यहाँ अध्ययन गरेका बटुकहरूको अनुशासन र संस्कारले स्थानीय समाजमा सकारात्मक प्रभाव पारेको बताउनुभयो। उनले कार्यपालिका टिममार्फत अभिभावकहरूलाई आफ्ना केही बालबालिका गुरुकुलमा पठाउन प्रेरित गर्ने अभियान पनि सञ्चालन भइरहेको जानकारी दिनुभयो। “खाना, आवास र अध्ययनको लागि सरकारले गरेको सहयोग हाम्रो लागि सौभाग्य बनिरहेको छ,” उपप्रमुख न्यौपानेले भन्नुभयो।

    राम नदी धाम संस्कृत गुरुकुलले परम्परागत संस्कृत शिक्षालाई आधुनिक शिक्षासँग जोड्दै संस्कार, विज्ञान र प्रविधिमार्फत नयाँ पुस्ताको निर्माण गरिरहेको छ। यसको संरक्षण र प्रवर्द्धनमा स्थानीय सरकारको सहयोग र अभिभावकहरूको चासोले भविष्यमा यसलाई अझ मजबुत र उदाहरणीय गुरुकुल बनाउने सम्भावना उजागर भएको छ।यस गुरुकुलमा महर्षि फाउण्डेसन अन्तर्गत दैनिक रूपमा रुद्राभिषेक कर्म, योग व्यायाम, संगीत शिक्षा लगायतका शारीरिक, मानसिक र आत्मिक अभ्यासहरू सञ्चालन हुँदै आएका छन्। साथै, कालीगण्डकी नदीमा विशेष पर्व, तिथि र उत्सवका अवसरमा सायं कालीन गण्डकी आरती समेत गुरुकुलद्वारा नियमित रूपमा सम्पन्न गरिन्छ, जसले धार्मिक र सांस्कृतिक चेतनाको विकासमा महत्त्वपूर्ण भूमिका खेलिरहेको छ।

    गुरुकुलमा अध्ययनरत बटुकहरूले अध्ययनसँगै व्यवहारिक र आध्यात्मिक गतिविधिमा पनि सक्रिय सहभागिता जनाउँदै आएका छन्। यहाँ धार्मिक भण्डारा प्रायः विभिन्न व्यक्तित्वहरूले आफ्ना जन्मोत्सव, शैक्षिक सफलता वा अन्य विशेष अवसरहरूमा आयोजना गर्ने चलन रहेको छ, जसले समाजमा दान, धर्म र सहकार्यको भावना बढाएको छ।

    शैक्षिक गुणस्तरको दृष्टिकोणले पनि यस गुरुकुल अन्य विद्यालयभन्दा कुनै हिसाबले पछाडि छैन। विभिन्न प्रतियोगितात्मक कार्यक्रमहरूमा सहभागी हुँदा यहाँका बटुकहरूले उत्कृष्ट अङ्क प्राप्त गर्ने गरेको प्रमाणित भएको छ। संस्कृत शिक्षाको मूल प्रवाहमा आधुनिक विषयवस्तुहरूको समेत समावेश गरेर दिइने शिक्षाले बटुकहरूलाई बहुआयामिक व्यक्तित्व निर्माणतर्फ उन्मुख गराएको छ।

    यसरी शारीरिक, मानसिक, बौद्धिक र धार्मिक चारै पक्षमा समन्वय गरी प्रदान गरिने शिक्षण–शिक्षा प्रणालीका कारण, आज राम नदी धाम संस्कृत गुरुकुल एक नमुना संस्थाको रूपमा उभिन सफल भएको देखिन्छ। यसले केवल संस्कृत शिक्षाको संरक्षण मात्र होइन, नवप्रवर्तनशील दृष्टिकोणको समेत विकास गरिरहेको छ, जसले गर्दा यो गुरुकुल हेर्न लायक र अनुकरणीय शिक्षालयको रूपमा चिनिँदै गएको छ।

  • कोटीहोम समापन, ४० लाख ५० हजार भन्दा बढी  भक्तजन सहभागी

    कोटीहोम समापन, ४० लाख ५० हजार भन्दा बढी भक्तजन सहभागी

    पोखरा । श्रीगण्डकी शतकुण्डीय गायत्री कोटीहोम विराट ज्ञान महायज्ञ शनिबारदेखि समापन भएको छ । ६१ दिन लामो कोटीहोममा करिब ४० लाख ५० हजार भक्तजन सहभागी भएको आयोजक मानव सेवा फाउण्डेशनले जनाएको छ ।
    कोटीहोममा करिब नौ करोड रुपैयाँ संकलन भएको कोटीहोमका सङ्कल्पकर्ता बालयोगेश्वर श्रीविजय कृष्णमूर्तिजी महाराजले जानकारी दिए ।
    कोटीहोमको सबै हिसावकिताव असार भित्रै फरफारक गरिने, पत्रकार सम्मेलन र सार्वजनिक सुनुवाई गरेरै आयव्यय सार्वजनिक गरिने उनले जानकारी दिए ।
    संकल्पकर्ता महाराजजीले कोटीहोमको केही आम्दानी मानव सेवा फाउण्डेशन, छोरीको घर र मानव कल्याणमा लगाउने प्रण गरे । समापन कार्यक्रममा कोटीहोम सम्पन्न गर्न सघाउने सबैप्रति आभार व्यक्त गरे ।
    समापनमा कोटीहोमका सहसंयोजक युवक लामिछानेले गणतन्त्रभित्र हिन्दू राज्य घोषणा हुनुपर्नेमा जोड दिए । उनले मामाघर अनाथ आश्रम बनाउनका लागि पाँच लाख, कोटीहोमका लागि एक लाख २५ हजार रुपैयाँ सहयोग गर्ने घोषणा गरे ।
    कोटीहोममा आयोजित रक्तदानमा नौ सय छ युनिट रगत संकलन भएको छ । साथै कोटीहोममा हालसम्मकै ठूलो धनराशि पुरस्कार भएको राष्ट्रिय भजन प्रतियोगिता तथा वक्तृत्वकला भएको थियो ।
    जेठ २६ गते पूर्णाहूति भएको हवनमा चार सय ब्राम्हणद्वारा एक करोड ५० लाख हवन भएको थियो ।
    कोटीहोममा पाँच सय २५ जनाको आयोजित ब्रतवन्ध, एक सय २० जनाको तुलादान, एक सय ३५ जनाको चौरासी पूजा, एक सय ४६ जनाको नवग्रह शान्ति, १४ जनाको काल सर्प योग पूजा, पाँच जनाको अर्क विवाह, अष्ट महादान चार, पितृको अर्चना ३३, लघु रुद्री पाँच, अति रुद्री १८, विवाह एक, गुन्यू चोली पाँच, लाखवत्ती सेवा २२ अन्य पूजा ४५ जनाले गरेको प्रचारप्रसार संयोजक लोकराज ढकालले जानकारी दिए ।
    कोटीहोमको हवन पूर्णाहूतिमा २१ करोड दीप प्रज्ज्वलन गरिएको थियो । कोटीहोम सफल भएको भन्दै पोखराका कृष्णराज अधिकारीले आठ मिनेट २५ सेकेण्ड लामो शंखघोष गरेका थिए भने तालबाराही मन्दिरमा एक हजार आठ नरिवल अर्पण गरिएको थियो । अधिकारीले शंखघोषसँगै हिन्दूराष्ट्र नेपालको समेत उद्घोष गरेका थिए ।
    हवन कुण्डमा वैशाख १९ गते बिहान ६ बजेर ४५ मिनेटमा विधिवत् रूपमा अग्नि मन्थन, ७ बजेर १५ मिनेटमा यज्ञ कुण्डमा अग्नि प्रवेश, ७ बजेर १९ मिनेटमा अग्निमा समीधा दान र ८ बजेर ५ मिनेटमा अग्नि कुण्डमा आहुति प्रदान गरी शुरु भएको थियो ।
    कुण्डमा तीन, तीन जना ब्राम्हणले हरेक दिन भगवती गायत्री मन्त्र विधिबाट हवन गरेका थिए । कोटीहोममा एक सय आठ भागवत महापुराण पाठ परायण, चार वेद पाठ परायण, सप्तचण्डी, अति रुद्री, मन्त्र जपलगायतमा ब्राम्हणले पाठ गरेका थिए ।
    प्रचारप्रसार संयोजक ढकालका अनुसार कोटीहोममा भागवत मञ्जरी राधिका दासी, अन्तर्राष्ट्रिय कथा वाचिका देवी प्रतिभा, अनुराधा पाण्डे, व्यासाचार्य प्रशान्त कृष्ण परांकुश, वाचन प्रवीण पं. दिनबन्धु पोखरेल, युवा दार्शनिक चैतन्यकृष्ण महाराजलगायत साधु सन्तले महायज्ञमा कथा वाचन गरेका थिए ।
    कोटीहोम पोखरा–१७ स्थित सदाशिवजी सिद्देश्वर हरिहर मन्दिर र स्थानीयको जग्गामा वैशाख १७ देखि जेठ ३१ सम्म सञ्चालन भएको थियो । यसअघि कोटीहोम जेठ २६ गते समापन हुने भनिए पनि भक्तजनको चापका कारण समयावधि थप भई ३१ गतेसम्म सञ्चालन भएको थियो ।
    कोटीहोम समापनसँगै भागवत मञ्जरी राधिका दासीको भव्य बिदाई गरिएको छ । दासीले जेठ १७ देखि समापनसम्म श्रीमद्भागवत कथा वाचन गरेकी थिइन् । दासीको बिदाईमा कोटीहोममा सहभागी सबै भावविह्वल भएका थिए ।

  • कोटिहोममा यज्ञको पूर्णाहुति, फाउन्डेसनलाई पोखराको २ रोपनी जग्गा दान

    कोटिहोममा यज्ञको पूर्णाहुति, फाउन्डेसनलाई पोखराको २ रोपनी जग्गा दान

    कोटिहोममा यज्ञको पूर्णाहुति, फाउन्डेसनलाई पोखराको २ रोपनी जग्गा दान

    पोखरा । पोखरामा जारी श्री गण्डकी शतकुण्डीय गायत्री कोटिहोम विराट ज्ञान महायज्ञमा सोमबार यज्ञको पूर्णाहुति भएको छ । चर्चित धर्मगुरु कालिदास वावा (काली बाबा) ले यज्ञको पूर्णाहुति  गरेका हुन् ।

    अमेरिकामा रहेका काली बाबा अमेरिकाबाट दिल्ली हुँदै काठमाण्डौं सम्मको लामो यात्रा गरेर यज्ञको पूर्णाहुति भएको महायज्ञका सङ्कल्पकर्ता बालयोगेश्वर श्री विजय कृष्णमूर्तिजी महाराजले जानकारी दिए ।

    ‘यज्ञको पूर्णाहुति कसबाट गर्ने भन्ने भएको थियो । समय छोटो थियो तर यति लामो यात्र गरेर यज्ञ पूर्णाहुति गर्न आउनुभयो यहाँ प्रति आभारी छौ’ उनले भने, ‘काली बाबाको कोटिहोम उपस्थिति यज्ञ प्रवित्र वनेको छ ।’

    यज्ञको पूर्णाहुति गर्न आएका काली बाबाले महायज्ञका सङ्कल्पकर्ता बालयोगेश्वर श्री विजय कृष्णमूर्तिजी महाराजलाई यज्ञ संम्राटको उपमा दिए । ‘यति ठूलो कोटिहोम न हिजो भयो न भोलि हुन्छ त्यो हिम्मत साथ बालयोगेश्वर गर्नुभयो’ उनले भने ‘यज्ञ संम्राट यज्ञ महापुरुषको रूपमा स्थापित हजुरलाई म कोटि कोटि नमन गर्दछु ।

    यज्ञको पूर्णाहुति गरिएसँगै होमन लगायतका पाठ परायणका सम्पूर्ण कार्य आज देखि नै समापन भएको महायज्ञ प्रचार प्रसार संयोजक लेखराज ढकाललाई जानकारी दिए ।  उनका अनुसार कोटीहोममा सहभागी भएका चार सय बढी ब्राम्हणलाई पनि सम्मानका साथ आज नै बिदाइ गरिएको छ ।  साथै व्रतबन्ध, चौरासी पूजासहित अन्य सम्पूर्ण कर्म पनि आज नै समापन भएको छ ।

    गते महिना वैशाख १९ गते बिहान ६ बजेर ४५ मिनेटमा विधिवत् रूपमा अग्नि मन्थन, ७ बजेर १५ मिनेटमा यज्ञ कुण्डमा अग्नि प्रवेशे, ७ बजेर १९ मिनेटमा अग्निमा समिधा दान र ८ बजेर ५ मिनेटमा अग्नि कुण्डमा आहुति प्रदान गरी  सुरु भएको हवन कुण्डको आज पूर्णाहुति गरिएको हो ।

    हवन कुण्डमा ३÷३ जना ब्रामणले कोटी होममा दिन दिनै भगवती गायत्री मन्त्र विधिबाट हवन गरेका थिए । कोटी होममा १०८ भागवत महापुराण पाठ परायण, ४ वेद पाठ परायण, सप्त चण्डी, अति रुद्री, मन्त्र जप लगायतमा ब्रामणले पाठ गरेका थियो । महायज्ञको विधिवत् पूर्णाहुति गरी अभिषेक र महाप्रसाद ग्रहण गरिएको थियो ।

    यज्ञको पूर्णाहुतिसँगै भोलि देखि तिलक र भस्म वितरण गरिने कार्यक्रम रहेको संयोजक ढकालले जानकारी दिए । उनका अनुसार यज्ञमा राखिएका जल सहितका कलश पनि बुकिङ गरेकाले भोलि देखि नै घरमा लैजान पाउनेछन् ।

    यसै गरी मानव सेवा फाउन्डेसनलाई सोमबार पोखरावासीले जग्गा दान गरेका छन् । पोखरामा मानव सेवा फाउन्डेसनको भवन निर्माण गर्ने उद्देश्य सहित पोखरा–५ प्रस्याड् निवासी गंगा केसीको परिवारले २ रोपनी जग्गा प्रदान गरेको मानव सेवा फाउन्डेसन नेपालका व्यवस्थापक विष्णु थापाले जानकारी दिए । त्यस स्थानमा आश्रम बनाएमा अझै जग्गा थप गर्ने केसीले जानकारी दिइन् । कोटिहोममा अहिले सम्म ३० लाख भक्तजनले कोटिहोमको दर्शन गरेका छन् ।
    कोटिहोममा नेपाल वैद्धिक महर्षी फाउन्डेसनका केन्द्रीय अध्यक्ष तथा पूर्व गृह राज्य मन्त्री दीपक प्रसाद वास्कोटा, पशुपति क्षेत्र विकास कोषका सदस्य सचिव डा. मिलन कुमार थापाले, मोटिभेटर विश्वराज गौतमले कोटिहोमले एकताको सन्देश दिएको बताएका थिए ।

    भागवत मञ्जरी दासीले कोटीहोममा जेठ १७ देखि श्रीमद्भागवत कथा वाचन गरिरहेकी छन् । उनले जेठ ३१ सम्म कथा वाचन गर्ने कार्यक्रम रहेको संयोजक ढकालले जानकारी दिए ।

    पोखरा–१७ स्थित सदाशिवजी सिद्देश्वर हरिहर मन्दिरको जग्गा र आसपासका स्थानीयको जग्गामा कोटिहोम सञ्चालन भइरहेको छ । कोटिहोम जेठ ३१  गतेसम्म सञ्चालन हुनेछ ।

  • राधिका दासीले कोटीहोममा सहयोग गर्ने, आज २१ करोड दीप प्रज्ज्वलन गरिँदै

    राधिका दासीले कोटीहोममा सहयोग गर्ने, आज २१ करोड दीप प्रज्ज्वलन गरिँदै

    पोखरा । पोखरामा जारी श्री गण्डकी शतकुण्डीय गायत्री कोटीहोम विराट ज्ञान महायज्ञकी प्रमुख कथा वाचिका एवं भागवत मञ्जरी राधिका दासीले दुई लाख ५१ हजार एक सय ५१ रुपैयाँ सहयोग गर्ने घोषणा गरेकी छन् । उनले उक्त रकम शनिबार हस्तान्तरण गर्ने प्रचारप्रसार संयोजक लेखराज ढकालले जानकारी दिए ।

    भागवत मञ्जरी दासीले कोटीहोममा जेठ १७ देखि श्रीमद्भागवत कथा वाचन गरिरहेकी छन् । उनले जेठ ३१ सम्म कथा वाचन गर्ने कार्यक्रम रहेको संयोजक ढकालले जानकारी दिए । यसअघि जेठ २६ सम्म सञ्चालन हुने कोटीहोमको समयावधि थप गरेर ३१ गतेसम्म पुर्‍याइएको हो ।

    दासीको कथा श्रवण गर्न कोटीहोममा भक्तजन ओइरिएका छन् । कोटीहोममा हालसम्म २३ लाख ५० हजार भक्तजन सहभागी भएको आयोजकको दावी छ । शनिबार २१ करोड दीप प्रज्ज्वलन गर्ने कार्यक्रम रहेकाले तीन लाख ५० हजार बढी भक्तजन सहभागी हुने आयोजकको अपेक्षा छ ।

    शनिबार बिहान १० बजे ज्योती भिजाउने र साँझ ६ बजे दीप प्रज्ज्वलन गरिने मानव सेवा फाउण्डेशनका व्यवस्थापक विष्णु थापाले थापाले जानकारी दिए । आआफ्नो घरबाट ज्योती लिएर दीप प्रज्ज्वलनमा सहभागी हुन भक्तजनलाई आग्रह गरिएको छ । यति ठूलो दीप प्रज्वलन सम्भवतः हालसम्म कहीँ पनि नभएको आयोजकको दावी छ ।

    शनिबार निर्जला एकादशीसमेत परेकाले फूलको होली खेल्ने कार्यक्रम रहेको प्रचारप्रसार संयोजक ढकालले जानकारी दिए ।

    शनिबारका लागि विभिन्न जिल्लाबाट भक्तजन बोकेर तीन सय पाँच वटा गाडी पोखरा भित्रिसकेको उनको भनाइ छ । अन्य दिनको तुलनामा शनिबार ऐतिहासिक हुने उनको दावी छ ।

    हालसम्म करिब सात करोड रकम सङ्कलन भएको महायज्ञका सङ्कल्पकर्ता बालयोगेश्वर श्रीविजय कृष्णमूर्तिजी महाराजले जानकारी दिए । पोखरा-१७ स्थित सदाशिवजी सिद्देश्वर हरिहर मन्दिर र स्थानीयको जग्गामा जारी कोटीहोम जेठ ३१ सम्म सञ्चालन हुनेछ ।

  • आज घरका मठमा तुलसीको बीउ राखिँदै

    आज घरका मठमा तुलसीको बीउ राखिँदै

    काठमाण्डौ – वैदिक सनातन धर्मावलम्बीले आ–आफ्नो घरको मठमा आज तुलसीको दल अर्थात बीउ राख्दै छन् । हरेक वर्ष ज्येष्ठ शुक्ल एकादशीका दिन घर घरमा तुलसीको दल राख्ने गरिन्छ । यस दिनलाई निर्जला एकादशी पनि भनिन्छ ।

    यस दिन रोपेको बीउ एक महिनापछि असार शुक्ल एकादशी अर्थात् हरिशयनी एकादशीका दिन रोपिन्छ । असार शुक्ल एकादशीदेखि कात्तिक शुक्ल एकादशीका दिनसम्म तुलसीको विशेष पूजा गरिन्छ । यसलाई तुलसी हुर्काइबढाई दामोदरसँग विवाह गरिने भन्ने पनि बुझिन्छ ।

    यो चार महिनालाई चतुर्मास पनि भनिन्छ । चतुर्मासमा स्नान, पूजन र दान गर्नाले मनोकाङ्क्षा पूरा हुने धार्मिक विश्वास छ । आयुर्वेदिक रूपमा पनि लाभकारी औषधि मानिने तुलसी विभिन्न रोगको उपचारसमेतमा प्रयोग गरिन्छ । तुलसीमा धेरै अक्सिजन पाइने आधुनिक विज्ञानसमेतले प्रमाणित गरेको छ । यस अवसरमा देशभरका नारायणस्थान एवम् विष्णु मन्दिरमा भक्तजनको घुइँचो लाग्छ ।