असार २१
चुरामणि तिमिल्सिना
रुरु क्षेत्र गाउँपालिका गुल्मीको तेस्रो चौमासिक सार्वजनिक सुनुवाइ कार्यक्रम सम्पन्न भएको छ। वडा नम्बर ३ थानपति स्वास्थ्य चौकीको सभाहलमा सार्वजनिक सुनुवाइ कार्यक्रममा स्थानीयको बाक्लो सहभागिता रहेको थियो।
गाउँपालिकाका अध्यक्ष यदु ज्ञवालीको अध्यक्षता रहेको कार्यक्रममा उपाध्यक्ष मिना देवी गौतम ,प्रमुख प्रशासकीय अधिकृत लक्ष्मण पाण्डे ,यस्तै वडा नम्बर १ देखि ६ सम्मका वडाध्यक्ष तथा कार्यवाहक अध्यक्षहरू , विभिन्न शाखाका शाखा प्रमुखहरू ,सार्वजनिक सुनुवाइ कार्यक्रममा जवाफ दिने वक्ताको रुपमा उपस्थित हुनुहुन्थ्यो। गाउँपालिकाले गरेका हरेक विकास निर्माण देखि सामाजिक क्रियाकलापमा पारदर्शिता गराउन हरेक वर्ष पालिकाले सार्वजनिक सुनुवाइ कार्यक्रम गर्नुपर्ने देखिन्छ । यसै अनुसार यस गाउँपालिकाले आज तेस्रो चौमासिक भित्र गरेका कार्यक्रमहरुको सार्वजनिक सुनुवाइ आयोजना गरेको हो।
कार्यक्रममा प्रमुख प्रशासकीय अधिकृत लक्ष्मण पाण्डेले तेस्रो चौमासिक भित्र पालिकाले गरेका हरेक क्रियाकलापहरु भइरहेका कार्यहरु र आगामी लक्ष्य समेतका कार्य योजनाहरू प्रस्तुत गर्दै कार्यक्रममाथि प्रकाश पार्नुभएको थियो
कार्यक्रममा स्थानीयले सडक निर्माण , शिक्षा , स्वास्थ्य, खानेपानी , विद्युत , यस्तै प्रशासनिक कार्य ,मागमा आधारित कार्यक्रम वितरण , जस्ता जिज्ञासा एवं पालिकालाई सल्लाह सुझाव समेत प्रदान गरेका थिए। कार्यक्रममा उठेका प्रश्नको जवाफ दिँदै अध्यक्ष ज्ञवालीले रुरु क्षेत्र गाउँपालिका विकास निर्माणदेखि शिक्षा स्वास्थ्य खानेपानी पूर्वाधार जस्ता महत्वपूर्ण योजनाहरूमा तीब्र रुपमा अगाडी बढेकोकाले आगामी दिनमा पनि यो पालिकाले निर्माणको कार्य देखि हरेक योजनालाई क्रमबद्ध रुपमा अगाडि सार्ने प्रतिबद्धता जनाउँदै ग्रामीण भेगमा जनताले भोग्दै आएका बाँदर तथा वन्यजन्तु लाई व्यवस्थापनका निम्ति हरेक सँग सल्लाह र सुझाव प्रतिक्रिया लिँदै आएको बताउनुभयो।
कार्यक्रममा उठेका प्रश्नहरूको जवाफ सम्बन्धित वडाका अध्यक्षहरु सम्बन्धि शाखा प्रमुख ले समेत दिनु भएको थियो।
कार्यक्रमको सहजीकरण रुरु संचार मिडिया प्राली रिडी र देशदर्शन मिडिया प्रणाली छत्रकोट ले गरेको थियो।
