सत्यवती–६ मा ४० दिने हार्मोनियम तालिम सम्पन्न : ग्रामीण प्रतिभा उजागर गर्दै २० प्रशिक्षार्थी दीक्षित
प्रतिमा भट्टराई रिडी असार २८
गुल्मीको सत्यवती गाउँपालिका–६ खैरेनी र उल्लिखोलामा सञ्चालित ४० दिने हार्मोनियम प्रशिक्षण कार्यक्रम सम्पन्न भएको छ। रुरु धार्मिक सेवा सञ्चार प्रा.लि. तथा रुरु सञ्चार कलाघरको आयोजनामा सञ्चालन गरिएको उक्त तालिममा २० जना प्रशिक्षार्थीको सहभागिता रहेको थियो। कार्यक्रममा युवा पुस्तादेखि ज्येष्ठ नागरिकसम्मको उत्साहजनक सहभागिता देखिएको थियो।
तालिमको प्रमुख प्रशिक्षकका रूपमा राष्ट्रिय भजन गायक विपिन तिवारीले सम्पूर्ण ४० दिन प्रशिक्षण दिनुभएको थियो। गाउँघरमा लुकेर रहेका प्रतिभाको पहिचान गर्ने, धर्म–संस्कृतिको संरक्षण गर्ने, संगीतमार्फत तनाव व्यवस्थापनमा सहयोग पुर्याउने तथा बुढेसकाललाई सिर्जनात्मक र आनन्दमय बनाउने उद्देश्यका साथ कार्यक्रम सञ्चालन गरिएको आयोजकले जनाएको छ।
दुई स्थानमा छुट्टाछुट्टै आयोजित समापन समारोहका प्रमुख अतिथिद्वय सत्यवती गाउँपालिका–६ का कार्यवाहक वडा अध्यक्ष छविलाल भट्टराई र वडा सदस्य युवराज न्यौपाने रहनुभएको थियो।
प्रशिक्षार्थीका तर्फबाट रामप्रसाद ढकाल र सिद्धिनाथ श्रेष्ठले आफ्नो भनाइ राख्दै गाउँमै पहिलो पटक यस्ता तालिम सञ्चालन भएकाले घरनजिकै संगीत सिक्ने अवसर प्राप्त हुनु अत्यन्तै खुसीको विषय भएको बताए। उमेर बढ्दै जाँदा हार्मोनियम आफ्नो साथी बनेको र सिकेको सीपलाई समाजमा उपयोग गर्ने प्रतिबद्धता पनि उहाँहरूले व्यक्त गर्नुभयो।
यस्तै प्रशिक्षार्थी लक्ष्मी शर्मा भण्डारीले हार्मोनियम र भजन संगीतले आफूलाई एक्लोपनमा पनि परिवारसँगै भएको अनुभूति गराएको बताउनुभयो। पूजा, विद्यालय वा दैनिक कामकाजका क्रममा भजनका धुनहरू मनमा गुञ्जिरहने र अहिले ती प्रस्तुत गर्न सक्ने अवस्थामा पुग्दा निकै खुसी लागेको उहाँको भनाइ थियो।
समापन समारोहमा बोल्दै प्रमुख अतिथिद्वय भट्टराई र न्यौपानेले ग्रामीण क्षेत्रमा समेत यस्ता सांगीतिक तालिम सञ्चालन गरेकोमा आयोजक संस्थाप्रति धन्यवाद व्यक्त गर्नुभयो। सिकेको सीपलाई समाजमा व्यवहारमा उतार्न सके मात्र तालिमको वास्तविक औचित्य पुष्टि हुने उहाँहरूको भनाइ थियो। साथै बालबालिका, महिला, युवा तथा ज्येष्ठ नागरिकलाई संगीतसँग जोडेर समाजलाई सकारात्मक दिशातर्फ लैजान यस्ता कार्यक्रम निरन्तर सञ्चालन गर्नुपर्नेमा उहाँहरूले जोड दिनुभयो।
विशिष्ट अतिथि तथा प्रमुख प्रशिक्षक विपिन तिवारीले ४० दिनको अवधिमा प्रशिक्षार्थीहरूले उल्लेखनीय प्रगति गरेको भन्दै सबैलाई बधाई तथा उज्ज्वल भविष्यको शुभकामना व्यक्त गर्नुभयो।
कार्यक्रमको अध्यक्षता रुरु धार्मिक सेवा सञ्चार प्रा.लि.का अध्यक्ष तथा रुरु सञ्चार कलाघरका सञ्चालक चुरामणि तिमिल्सिनाले गर्नुभएको थियो। अध्यक्ष तिमिल्सिनाले छोटो समयमै प्रशिक्षार्थीहरूले हार्मोनियममा राम्रो दक्षता हासिल गरेको देख्दा गर्व लागेको बताउँदै आगामी दिनमा पनि विभिन्न पालिका, विद्यालय तथा महिला समूहसँग सहकार्य गरी यस्ता सिर्जनात्मक तालिमलाई थप विस्तार गरिने प्रतिबद्धता व्यक्त गर्नुभयो। विभिन्न स्थानबाट यस्ता तालिम सञ्चालनका लागि माग बढ्दै गएको उहाँले जानकारी दिनुभयो।
कार्यक्रमको अवसरमा सम्पूर्ण प्रशिक्षार्थीलाई प्रमाणपत्र वितरण गरिएको थियो भने कार्यक्रम सफल बनाउन योगदान पुर्याउने व्यक्ति तथा संस्थालाई सम्मानसमेत गरिएको थियो।कार्यक्रमको संचालन कृष्ण प्रसाद ढकाल र मुकुन्द ज्ञवालीले गर्नु भएको थियो।
About Author
