असार १४
चुरामणि तिमिल्सिना
गुल्मी जिल्लाको कालीगण्डकी गाउँपालिका अन्तर्गत रहेको दुर्गा भवन माध्यमिक विद्यालयल छापचौर यस वर्ष विगतका वर्षहरूको तुलनामा उत्कृष्ट नतिजा हासिल गर्दै पालिकाभित्रकै सबैभन्दा बढी विद्यार्थी उत्तीर्ण गराउने विद्यालय बन्न सफल भएको छ।
विद्यालयबाट एसईई परीक्षा दिएका ४५ जना विद्यार्थीमध्ये २९ जना विद्यार्थी उत्तीर्ण भएका छन्। यससँगै दुर्गा भवन मावि कालीगण्डकी गाउँपालिकामै सर्वाधिक विद्यार्थी उत्तीर्ण गराउन सफल विद्यालय बनेको हो।
विगतमा निराशाजनक नतिजा भोग्दै आएको विद्यालयले यस पटक उत्कृष्ट नतिजा ल्याउन सफल भएकोमा विद्यालय व्यवस्थापन समिति अध्यक्ष सुरेश ढकालले खुशी व्यक्त गर्नुभयो।
“मैले अध्यक्ष पद सम्हालेपछि विद्यालयको शैक्षिक गुणस्तरमा व्यापक सुधार ल्याउन प्रयास गरें,” अध्यक्ष ढकालले भन्नुभयो, “विज्ञान प्रयोगशालाको विकास, शैक्षिक सामग्रीको व्यवस्थापन र विद्यार्थीकै बौद्धिक क्षमताको विकासमा ध्यान दिएकाले नतिजामा पनि सुधार देखिएको हो।”
उहाँले थप्दै विद्यालयको समग्र प्रगतिको श्रेय शिक्षक, अभिभावक, व्यवस्थापन समिति र स्थानीय समुदायको निरन्तर सहयोगलाई दिनुभयो। विद्यालयको यस प्रगतिमा सबैको योगदान रहेको उल्लेख गर्दै उहाँले सबैप्रति आभार व्यक्त गर्नुभएको छ।“विद्यालयका प्रधानाध्यापक विजय ढकालले विद्यार्थीहरूको अथक प्रयास र शिक्षकहरूको निरन्तर योगदानले विद्यालयको शिर उच्च भएको बताउनुभयो। आगामी दिनमा विद्यालयको नतिजा अझ सुधार गर्दै, विद्यार्थीहरूलाई बौद्धिक कार्यक्रमहरूमा समेत सक्रिय बनाउने प्रतिबद्धता उहाँले व्यक्त गर्नुभयो।”
About Author
