रिडी असार १६ । चुरामणि तिमिल्सिना
कालीगण्डकी गाउँपालिका–५, छापचौरस्थित श्री दुर्गा भवन माध्यमिक विद्यालयले यस वर्षको माध्यमिक शिक्षा परीक्षा (एसईई) मा उत्कृष्ट नतिजा हासिल गर्ने विद्यार्थीहरूलाई भव्य समारोहका बीच सम्मान गरेको छ। विद्यालय प्राङ्गणमा आयोजित कार्यक्रममा पञ्चेबाजा सहित विद्यालयका विद्यार्थीहरू, अभिभावक, शिक्षक तथा समुदायका प्रतिनिधिहरूको उपस्थितिमा सम्मान कार्यक्रम सम्पन्न गरिएको हो।
सम्मान कार्यक्रममा विद्यालयले सफल विद्यार्थीहरूलाई फूलमाला, अबिर प्रदान गर्दै आगामी शैक्षिक यात्राका लागि शुभकामना दिएको थियो। विद्यालयको यस्तो सम्मान कार्यक्रम यस वर्षदेखि मात्र सुरु गरिएको हो।
कार्यक्रमकै अवसरमा विद्यालयले विभागीय जिम्मेवारीसहित शिक्षक रामप्रसाद गौतम र शिक्षक तेजेन्द्र क्षेत्रीलाई सहायक प्रधानाध्यापकको रूपमा नियुक्त गरेको छ। विभागीय ढाँचामा दुईजना सहायक प्रधानाध्यापक नियुक्त गर्ने अभ्यास गुल्मी जिल्लामा पहिलोपटक भएको दाबी गरिएको छ। विद्यालय व्यवस्थापन समितिका अनुसार, यस नविन अभ्यासले विद्यालयको शैक्षिक प्रशासनलाई थप व्यवस्थित र प्रभावकारी बनाउने विश्वास गरिएको छ।
त्यसैगरी, विद्यालय व्यवस्थापन समितिका पूर्व सदस्य एवं वयोवृद्ध समाजसेवी यमलाल पौडेललाई समेत विद्यालयले सम्मान गरेको थियो। लामो समयदेखि विद्यालय र समुदायमा गरेको योगदानको कदर गर्दै उहाँलाई सम्मान गरिएको हो।
विद्यालय व्यवस्थापन समितिका अध्यक्ष सुरेश ढकालले सम्मान कार्यक्रममा बोल्दै भने, “यस्ता सम्मान कार्यक्रमले विद्यार्थीको मनोबल उच्च बनाउने मात्र होइन, साना कक्षामा अध्ययनरत विद्यार्थीहरूलाई पनि थप मेहनत गर्ने प्रेरणा दिन्छ। यसैले अबदेखि यस्तो कार्यक्रमलाई नियमित रुपमा निरन्तरता दिइनेछ।”
विद्यालयको यो कदमले शैक्षिक गुणस्तर अभिवृद्धिका साथै विद्यार्थी, अभिभावक र विद्यालयबीचको सम्बन्धलाई अझ बलियो बनाउने अपेक्षा गरिएको छ।
About Author
Leave a Reply