असार १३
चुरामणी तिमिल्सिना
रामकोट आधारभूत विद्यालय, चन्द्रकोट गाउँपालिका–७, दमुकामा शुक्रबार विशेष कार्यक्रम अन्तर्गत श्रुति लेखन प्रतियोगिता सम्पन्न भएको छ। कक्षा नर्सरीदेखि कक्षा ५ सम्म अध्ययनरत ९१ जना विद्यार्थीहरूले उक्त प्रतियोगितामा उत्साहपूर्वक सहभागिता जनाएका थिए।
बिरलै आयोजना हुने श्रुति लेखन प्रतियोगिताबाट विद्यार्थीहरूको भाषा सीप, ध्यान केन्द्रित गर्ने क्षमता र लेखन शुद्धता अभिवृद्धिमा टेवा पुग्ने विद्यालय पक्षको विश्वास रहेको छ। यसअघि पनि विद्यालयले हाजिरीजवाफ, लोक नृत्य, चित्रकला, वक्तृत्वकला, दुना-टपरी बनाउने जस्ता विभिन्न सिर्जनात्मक कार्यक्रमहरू सञ्चालन गर्दै आएको छ।
विद्यालय व्यवस्थापन समितिका अध्यक्ष कमल सुनारले विद्यार्थीकै समग्र विकासमा यस्ता कार्यक्रमले महत्वपूर्ण भूमिका खेल्ने भन्दै विद्यालयका शिक्षक-शिक्षिकालाई धन्यवाद ज्ञापन गर्नुभयो
विद्यालयका प्रधानाध्यापक बसन्ती अर्याल न्यौपानेले प्रतियोगिताबाट विद्यार्थीको बौद्धिक क्षमताको विकास हुनुका साथै अभिभावकमाझ सचेतना फैलिने विश्वास व्यक्त गर्नुभयो।
प्रतियोगितामा शुद्ध लेखन गर्ने सबै विद्यार्थीलाई हौसलाका लागि स्टेसनरी सामग्री वितरण गरिएको थियो। विद्यालयमा प्रत्येक शुक्रबार फरक–फरक सिर्जनात्मक कार्यक्रम सञ्चालन हुँदै आएको छ। कहिले योग अभ्यास, कहिले खाजा बनाउने तालिमजस्ता कार्यक्रममार्फत विद्यार्थीलाई व्यवहारिक ज्ञान प्रदान गर्ने प्रयास भइरहेको विद्यालयले जनाएको छ।
हाल विद्यालयमा ९१ जना विद्यार्थी अध्ययनरत छन्। विद्यालयमा खाजा कार्यक्रम सञ्चालनमा आएपछि विद्यार्थी तथा अभिभावक दुवैमा खुसी छाएको छ।
About Author
