बुटवल,२४ साउन ।
विश्व आदिवासी दिवस शनिबार बुटवलमा पनि बिभन्न कार्यक्रमका साथ मनाइएको छ ।
बुटवल उपमहानगरपालिकाकाे सहयोगमा राष्ट्रिय आदिवासी जनजाति महिला महासंघ बुटवल उपमहानगर समन्वय समितिद्वारा आयोजित ३१ औं विश्व आदिवासी दिवस कार्यक्रममा आदिवासी जनजाति अगुवाहरूले प्राप्त उपलब्धिकाे र रक्षा थप अधिकारका लागि आदिवासी जनजातिहरू एकजुट हुनुपर्नेमा जाेड दिए ।
कार्यक्रममा प्रमुख अतिथि समेत रहेका बुटवल उपमहानगरपालिकाका नगर प्रमुख खेलराज पाण्डेयले आदिवासी जनजातिका भाषा, कला,संस्कार र संस्कृतिकाे संरक्षण र प्रवर्द्धनमा बुटवल उपमहानगरपालिकाले सधै सहयोग गर्दै आएको बताउदै आगामी दिनमा पनि त्यस्तो सहयोग जारी राख्ने प्रतिवद्वता ब्यक्त गरे ।
बुटवल उपमहानगरपालिकामा आफुहरू आएपछि आदिवासी जनजातिको भाषा,कला,संस्कार र संस्कृतिकाे संरक्षण,विकास र बिस्तारका लागि विभिन्न योजनाहरू अगाडि बढाएको भन्दै नगर प्रमुख पाण्डेयले नेपालीसहित मगर,नेवार र थारू भाषामा नागरिक बडापत्र राखिएको जानकारी गराए ।
आदिवासी जनजातिका हक अधिकार प्रति आफू
सचेत रहेको बताउदै उनलेे विभिन्न जातीय समुदायकाे पहिचान, चाडपर्व,भाषा,कला,संस्कार र संस्कृतिको संरक्षणका लागि आफू सधै सक्दाे सहयोग गर्न तयार रहेको उल्लेख गरे ।
साे अवसरमा नेपाल मगर संघ केन्द्रीय सदस्य तथा रूपन्देही इन्चार्ज धनी आलेले बिगतमा भएका आन्दोलनबाट प्राप्त गरेका उपलब्धिहरू पनि गुम्नसक्ने तर्फ सचेत हुन जरुरी रहेकोमा जाेड दिइन् ।
राष्ट्रिय आदिवासी जनजाति महिला महासंघ बुटवल उपमहानगर समन्वय समिति अध्यक्ष धनिसरा दर्लामीकाे सभापतित्वमा सम्पन्न कार्यक्रममा नेपाल मगर संघ केन्द्रीय सदस्य मधु राना,नेपाल आदिवासी जनजाति महासंघ जिल्ला समन्वय समिति रूपन्देही अध्यक्ष चित्रलाल तुलाचन, नेवा पुच रूपन्देहीका अध्यक्ष काजीमान श्रेष्ठ,तमु ह्युल छाेज धी गुरूङ जिल्ला समितिका पुर्व अध्यक्ष बिमला गुरूङ,राष्ट्रिय आदिवासी जनजाति महिला महासंघ जिल्ला समन्वय परिषद् रूपन्देही अध्यक्ष होमाया गुरूङ, नेपाल आदिवासी जनजाति महासंघ जिल्ला सदस्य लक्ष्मी श्रेष्ठ,तमु ह्युल छाेज धी गुरूङ परिषद बुटवल उपमहानगर समिति उपाध्यक्ष उमा गुरूङ,नेपाल मगर संघ बुटवल उपमहानगर समिति उपाध्यक्ष लुमबहादुर सारू,थकाली सेवा समाज बुटवलका अध्यक्ष नेपाल तारा गाैचन, राष्ट्रिय आदिवासी जनजाति महिला महासंघ बुटवल उपमहानगर समिति सह-सचिव कुमारी बराल मगरलगायतले आफ्नो भाषा,कला,संस्कार र संस्कृतिको संरक्षणका साथै आदिवासी जनजातिका युवा विद्यार्थीहरूले अध्ययन अध्यापनमा पनि ध्यान दिनुपर्नेमा जाेड दिए ।
आईएलओ १६९ मा हस्ताक्षर गरेर पनि नेपाल सरकारले उक्त धारा कार्यान्वयन नगरेको भन्दै उनिहरूले पृथ्वी सुब्बा गुरूङ मुख्यमन्त्री हुँदा उनलेे चाहेको भए गण्डकी प्रदेशको नाम तमुवान नामाकरण गर्न सकिने अवस्था भए पनि नगरिएको गुनासो गरे ।
पछिल्लो समय जनजातिहरू आफ्नो समुदाय भन्दा राजनीतिक पार्टीमा बढी केन्द्रीत हुँदा आदिवासी जनजातिका मुद्दा ओझेलमा परेको भन्दै उनिहरूले आफ्नो जातीय पहिचान,भाषा,कला,संस्कार र संस्कृतिको संरक्षण तथा प्राप्त अधिकारकाे रक्षा र थप अधिकार प्राप्तिका लागि एकजुट हुनुपर्ने आवश्यकता औल्याए ।
About Author
