Blog

चुरामणि  तिमिल्सिना

रिडी असार  ७

कमल शर्मा फाउन्डेसनद्वारा सरस्वती माविलाई ८ लाख सहयोग, २३५ विद्यार्थीलाई शैक्षिक सामग्री वितरण
गुल्मी, सत्यवती। गुल्मी जिल्लाको सत्यवती गाउँपालिका–६, जोहाङस्थित सरस्वती माध्यमिक विद्यालयको भौतिक संरचना निर्माण तथा शैक्षिक वातावरण सुधारका लागि कमल शर्मा फाउन्डेसनले रु. ८ लाख आर्थिक सहयोग प्रदान गरेको छ।
विद्यालय परिसरमा आयोजित एक कार्यक्रमका बीच फाउन्डेसनकी सञ्चालक सरिता शर्मा आचार्यले विद्यालयलाई रु. ८ लाखको चेक हस्तान्तरण गर्नुभएको हो। कार्यक्रममा बोल्दै आचार्यले आफूले यसै विद्यालयमा कक्षा १ देखि १० सम्म अध्ययन गरेको स्मरण गर्दै पछिल्ला पुस्ताका विद्यार्थीहरूले अझ व्यवस्थित र सुविधासम्पन्न भवनमा अध्ययन गर्न सकून् भन्ने उद्देश्यले सहयोग गरेको बताउनुभयो।
उहाँले समाजमा जन्म लिएपछि सामाजिक उत्तरदायित्व निर्वाह गर्दै शिक्षा, स्वास्थ्य, धार्मिक तथा अन्य सामाजिक क्षेत्रमा सहयोग गर्नु सबैको कर्तव्य भएको उल्लेख गर्नुभयो। यस्ता रचनात्मक कार्यमा जोडिन पाउँदा आफूलाई गर्व लागेको समेत उहाँले बताउनुभयो।
आचार्यले आफ्ना स्वर्गीय श्रीमान्ले जीवनभर सामाजिक सेवामा पुर्‍याउनुभएको योगदानलाई निरन्तरता ,उहाँकै सपना पुरा गर्नका लागि फाउन्डेसनमार्फत विभिन्न क्षेत्रमा सहयोग गर्दै आएको जानकारी दिनुभयो। विद्यालयमा आवश्यक पूर्वाधार तथा अन्य संरचनाको अभाव रहेमा आगामी दिनमा समेत सक्दो सहयोग गर्ने प्रतिबद्धता उहाँले व्यक्त गर्नुभयो।
विद्यालयका प्रधानाध्यापक छविलालभण्डारी का अनुसार केही वर्षअघि सरिता शर्मा आचार्यको परिवारले स्वर्गीय बुबा हेमलाल आचार्यको स्मृतिमा विद्यालयमा रु. १ लाखको अक्षयकोष स्थापना गरेको थियो।
यसै अवसरमा 1 Step Foundation को सहयोगमा विद्यालयमा अध्ययनरत कक्षा १ देखि १० सम्मका २३५ जना विद्यार्थीलाई शैक्षिक सामग्री समेत वितरण गरिएको थियो। फाउन्डेसनले शिक्षा लगायत विभिन्न सामाजिक क्षेत्रमा निरन्तर सहयोग गर्दै आएको कार्यक्रममा जानकारी गराइएको थियो।
समारोहका प्रमुख अतिथि तथा सत्यवती गाउँपालिका अध्यक्ष टिकाराम पाण्डेले विदेशमा रहेका नेपाली दिदीबहिनीहरूले शिक्षा क्षेत्रको विकासमा पुर्‍याउँदै आएको योगदानको प्रशंसा गर्दै धन्यवाद व्यक्त गर्नुभयो। पालिकाको सीमित स्रोतसाधनका बीच विद्यालयको भौतिक विकासमा यस्ता सहयोगले ठूलो टेवा पुग्ने उहाँको भनाइ थियो। कार्यक्रम शिक्षा प्रेमि , अभिभावक विशिष्ट ब्याक्तित्व पुर्व बिद्यार्थी तथा स्थानीयको सहभागीता रहेको थियो।
कार्यक्रममा विद्यालयका प्रधानाध्यापक छविलाल भण्डारी ले सहजीकरण गर्नुभएको थियो भने मनिराम गौतमको स्वागत मन्तव्य रहेको समारोह विद्यालय व्यवस्थापन समितिका कार्यवाहक अध्यक्ष होमबहादुर गुरुङको अध्यक्षता तथा शिक्षक श्रीधर गौतमको सञ्चालनमा सम्पन्न भएको थियो।
कार्यक्रमकै अवसरमा विद्यालयको विकास तथा शैक्षिक उन्नयनमा योगदान पुर्‍याउने विभिन्न व्यक्तित्वहरूलाई विद्यालयले सम्मान समेत गरेको थियो।

चुरामणि तिमिल्सिना  रिडी असार ५

रुरु क्षेत्र गाउँपालिका गुल्मीको २०औँ गाउँसभा सुरु, आगामी आर्थिक वर्षको नीति तथा कार्यक्रम प्रस्तुत भएको छ ।
रुरु क्षेत्र गाउँपालिकाको२० औँ गाउँसभाको पहिलो बैठक आज सुरु भएको छ। बैठकमा आगामी आर्थिक वर्ष २०८३/८४ का लागि नीति तथा कार्यक्रम प्रस्तुत भएको छ । गाउँसभाका अध्यक्ष तथा गाउँपालिकाका अध्यक्ष यदु ज्ञवालीले आर्थिक वर्ष ८३/८४ को लागि नीति तथा कार्यक्रम सभामा प्रस्तुत गर्नुभएको हो ८३/८४ को बजेट प्रस्तुत गर्नभन्दा पूर्व विगत वर्षमा गाउँपालिकाले सम्पादन गरेका कामको समेत समीक्षा गर्दै यस वर्ष थप नयाँ कार्यक्रमका साथ गाउँपालिका अगाडि बढ्ने जानकारी दिनुभयो

। सभामा शिक्षा क्षेत्रमा आमूल परिवर्तन गर्नका निम्ति डिजिटल शिक्षाको विस्तार माथिल्लो तहका विद्यार्थीलाई होस्टेलको सुविधा राख्ने नीति ल्याइएको बताउनुभयो। म बनाउँछु मेरो विद्यालय अभियान पनि यसै वर्षबाट सुरुवात गर्ने नीति कार्यक्रममा उल्लेख गरिएको छ। युवाहरूको सिप क्षमता र प्रतिस्पर्धात्मक दक्षता अभिवृद्धि गर्दै सरकारी सेवा तथा अन्य व्यवसायिक क्षेत्रमा पहुँच विस्तार गर्न लोकसेवा शिक्षक सेवा बैङ्किङ सेवा लगायतका तयारी कक्षाहरू समेत निःशुल्क सञ्चालन गरिने नीति ल्याइएको हो। यस्तै पछिल्लो समयमा युवाहरू क्रिकेट प्रेमी भएकोले क्रिकेट बन्द प्रशिक्षण समेत यसै वर्ष सञ्चालन गरिने नीति कार्यक्रममा उल्लेख गरिएको छ। पालिकामा भएका खेलमैदानलाई थप व्यवस्थित र आकर्षक बनाउनका लागि पहल र प्रयास गरिने समेत कार्यक्रम उल्लेख गरिएको छ। दीर्घ रोगी तथा अति विपन्न नागरिकहरूलाई लक्षित गर्दै घरदैलो स्वास्थ्य सेवा कार्यक्रमलाई थप प्रभावकारी रुपमा अगाडि सारिने, १५ शैया को आधारभूत अस्पताललाई छिटै सञ्चालन गर्ने महिला तथा अति विपन्न नागरिकहरूका निम्ति स्थानीय कला संस्कृति परम्परालाई पर्यटनमा जोड्दै अगाडि लाने कार्यक्रममा उल्लेख गरिएको छ यस्तै नीति कार्यक्रममा स्थानीय भाषा संस्कृति भेषभुषा मौलिक पहिचान जात्रा तथा सांस्कृतिक सम्पदाको संरक्षण समवर्धन पुस्ता हस्तान्तरण समेत गरिने कार्यक्रममा उल्लेख गरिएको छ एक घर १धारा अभियानलाई पूर्णता दिने कार्यक्रम अगाडि सारिएको छ।

यस्तै किसानलाई भाडामा अनुदान बैंक ऋणबाट खेती गर्ने किसानलाई ब्याजमा सहुलियत कृषकलाई कृषिमा आकर्षित गर्न थप व्यवसायिक मुलक कार्यक्रमहरू र माटो परीक्षण एवं सुधारात्मक कार्यक्रमलाई निरन्तरता दिने नीति कार्यक्रममा उल्लेख गरिएको छ। यस्तै नीतिमा महामारी रोगको नियन्त्रणका लागि खोप अभियान तथा प्राविधिक परामर्श सेवाको विस्तार समेत गरिने नीति कार्यक्रममा उल्लेख गरिएको छ। यस्तै एक वडा उत्पादनलाई प्रभावकारी रूपमा पकेट क्षेत्रको रुपमा र विशिष्ट कृषि उत्पादनलाई प्राथमिकता राखेर अगाडि गरिने नीति कार्यक्रममा उल्लेख गरिएको छ। कृषि तथा पशुपालन क्षेत्रको आधुनिकरण व्यवसायीकरण मार्फत आत्मनिर्भरता हासिल गर्न रिमुवा फाटलाई स्मार्ट कृषि प्रवर्धन क्षेत्रका रुपमा विकास गरिने र पशुपालनको प्रचुर सम्भावना भएको ग्वादी भट्कुवा क्षेत्रलाई पकेट क्षेत्रको रुपमा समेत प्रवर्द्धन गर्ने नीति कार्यक्रममा उल्लेख गरिएको छ।

वैदेशिक रोजगारबाट फर्किएका युवाहरूलाई ज्ञानसिप र पुञ्जीलाई उपयोग गर्न प्रविधि हस्तान्तरण प्रवर्धन कार्यक्रममा सञ्चालन गरिने पनि नीति कार्यक्रममा उल्लेख गरिएको छ। उत्पादन र व्यापारका महिलाको सरोकार भन्ने मर्मलाई स्थापित गर्दै महिला आत्मनिर्भर बनाउनका लागि विभिन्न विकासका कार्यक्रमहरू सञ्चालन गर्ने नीति कार्यक्रममा उल्लेख गरिएको छ। पर्यटकीय पूर्वाधार क्षेत्रको सौन्दर्यकरण सूचना तथा संकेत प्रणाली धार्मिक तथा सांस्कृतिक सम्पदाको संरक्षण प्रवर्धनलाई एकीकृत रुपमा अगाडि बढाउँदै स्थानीय कला विशिष्ट पहिचानलाई उजागार गरिने , यस्तै श्रृंगेश्वर धाम बम्घाकोट पर्यटकीय विकास आयोजनालाई बहुवर्षीय योजनाको रूपमा लैजानको लागि स्रोत सुनिश्चितका लागि पहल समेत गरिने नीति कार्यक्रममा उल्लेख गरिएको छ। यस्तै पालिकाभरि सञ्चालन भएका सहकारी लाई व्यवस्थित गर्नका निम्ति सहकारीसँग सम्बन्धित विभिन्न कार्यक्रमहरु सञ्चालन गरिने त्यस्तै बजारको गुणस्तरीय खाद्यवस्तुको व्यवस्थित उचित व्यवस्थापन गर्नका निम्ति अनुगमन पटकपटक गर्ने पनि नीति कार्यक्रममा उल्लेख गरिएको छ रुरु क्षेत्रको ऐतिहासिक तीन मुख्य पुललाई आकर्षक बत्ती राख्नका निम्ति तानसेन नगरपालिका , कालीगण्डकी गाउँपालिका शीत सहकार्य गरिने नितिमा उल्लेख गरिएको छ ।

शून्य बेरुजु वर्षको रूपमा लैजाने नीति कार्यक्रममा उल्लेख गरिएको छ। यस्तै मदन भण्डारी राजमार्गको सडक भित्तामा रङ्गन गरी आकर्षक पर्यटकीय क्षेत्र कलात्मक क्षेत्र बनाउने यसै चालु आर्थिक वर्षमा सम्पन्न समेत गर्ने उल्लेख गरिएको छ। यस्तै नेपालको चार धाम मध्यको एक धाम रुरु क्षेत्रमा यस वर्ष माघेसंक्रान्ति मेलालाई भव्य र सभ्य रुपमा सम्पन्न गर्न र प्रचारप्रसारका निम्ति माघ महिनाभरि अर्थात् माघ महिनालाई महास्नान महिनाको रूपमा मनाउने व्यवस्था समेत गरिने नीतिमा उल्लेख गरिएको छ । यस्तै यस क्षेत्रमा सङ्ग्रहालयको रुपमा पनि केही सामग्रीहरू जुटेको कारणले पालिकाले थप व्यवस्थितका साथ यसलाई सञ्चालन गर्ने नीति समेत उल्लेख गरेको छ। आगामी वर्ष कम्तीमा पनि १० किलोमिटर सडक कालेपत्रे गर्ने लक्ष्य राखिएको छ। खेलकुद क्षेत्रलाई प्रवर्द्धन गर्नका निम्ति वडाध्यक्ष कप तथा पालिका अध्यक्ष कप समेत सञ्चालन गरिने महिलाको क्षमता र सीप विकासका निम्ति विभिन्न तालिमहरू समेत प्रदान गर्ने कार्यक्रममा उल्लेख गरिएको छ। विपन्न महामारी आउन नदिनेका निम्ति पूर्व तयारी समेत गर्ने नीति कार्यक्रममा उल्लेख गरिएको छ। यस्तै तीन सन्तान जन्माउने परिवारलाई प्रोत्साहन समेत गर्ने नीति कार्यक्रममा उल्लेख गरिएको छ। यस्तै नीति कार्यक्रम प्रस्तुत पश्चात् गाउँसभाका सदस्यहरूले उठाएका जिज्ञासाहरूको जवाफ गाउँसभाका अध्यक्ष यदु ज्ञवालीले दिनुभएको थियो।
आगामी दोस्रो बैठक असार १० गते बस्ने गरी तय भएको छ।

जनताको सेवासँगै कृषि कर्ममा सक्रिय वडाध्यक्ष अर्जुन कनौजे
चुरामणि तिमिल्सिना  रिडी असार  ३

गुल्मी जिल्लाको सत्यवती गाउँपालिका–१ का वडाध्यक्ष अर्जुन कनौजे जनप्रतिनिधिको जिम्मेवारीसँगै कृषि कर्ममा पनि उत्तिकै सक्रिय देखिएका छन्। जनताले पाँच वर्षका लागि निर्वाचित गरेर पठाएका कनौजे बिहान र साँझको समय प्रायः आफ्नै खेतबारीमा बिताउने गर्छन्।
मकै, तरकारी तथा फलफूल खेतीमा रुचि राख्ने कनौजे जनप्रतिनिधि भए पनि श्रम र उत्पादनसँग जोडिनु आवश्यक रहेको बताउँछन्। गाउँमा कृषि उत्पादन बढाएर आत्मनिर्भरता हासिल गर्न सकिने उनको विश्वास छ।
वडाध्यक्ष कनौजेका अनुसार जनताको सेवा नै आफ्नो प्रमुख दायित्व हो। “दिन होस् वा रात, जनताको समस्या समाधान गर्न पाए मनमा आनन्द मिल्छ,” उनी भन्छन्। जनप्रतिनिधिको जिम्मेवारीसँगै कृषि क्षेत्रमा सक्रिय रहँदा कृषकका समस्या नजिकबाट बुझ्न र समाधानका उपाय खोज्न सहज हुने उनको अनुभव छ।
सत्यवती गाउँपालिका–१ मा सडक, खानेपानी, शिक्षा, स्वास्थ्य तथा अन्य पूर्वाधार विकासलाई प्राथमिकतामा राखेर काम भइरहेको उनले जानकारी दिए। यी आधारभूत क्षेत्रमा थप सुधार गर्न सके स्थानीय नागरिकको जीवनस्तर उकास्न र बढ्दो बसाइँसराइ रोक्न महत्वपूर्ण योगदान पुग्ने उनको भनाइ छ।
कृषि उत्पादनसँग प्रत्यक्ष जोडिएका वडाध्यक्ष कनौजे श्रमप्रतिको सम्मान र विकासप्रतिको प्रतिबद्धताका कारण स्थानीयवासीमाझ उदाहरणीय जनप्रतिनिधिका रूपमा परिचित बन्दै गएका छन्। जनताको सेवासँगै खेतबारीमा पसिना बगाउने उनको शैलीले जनप्रतिनिधि र नागरिकबीचको दूरी घटाउन मद्दत गरेको स्थानीयको भनाइ छ।

जन्म दिनमा  फजुल खर्च होइन, समाजसेवा : युवा व्यवसायी गणेश भट्टराईद्वारा विद्यालय र स्वास्थ्य संस्थालाई सहयोग

चुरामणि तिमिल्सिना   रिडी २८

जन्मदिन मनाउने परम्परा पछिल्लो समय विभिन्न शैलीमा विकसित हुँदै गएको छ। अधिकांश युवापुस्ताले केक काट्ने, भोजभतेर गर्ने, होटल तथा रेष्टुरेन्टमा साथीभाइसँग रमाइलो गरेर जन्मदिन मनाउने चलन बढ्दो छ। तर समाजलाई सकारात्मक सन्देश दिने र उदाहरणीय कार्यमार्फत जन्मदिन मनाउने अभ्यास भने कमै देखिन्छ।
यही परिप्रेक्ष्यमा गुल्मीको सत्यवती गाउँपालिका–४, लिम्घाका धार्मिक, आध्यात्मिक तथा सफल युवा व्यवसायी गणेश भट्टराईले आफ्नो जन्मदिनलाई समाजसेवासँग जोड्दै फरक शैलीमा मनाउनुभएको छ। फजुल खर्च कटौती गरी रचनात्मक तथा सामाजिक कार्यमा रकम खर्च गरेर उहाँले समाजमा सकारात्मक सन्देश प्रवाह गर्नुभएको हो।
भट्टराईले लिम्घास्थित विभिन्न शैक्षिक तथा सामाजिक संस्थाहरूलाई सहयोग प्रदान गर्नुभएको छ। यसक्रममा उहाँले लिम्घा स्वास्थ्य चौकीलाई एक थान भित्ते घडी प्रदान गर्नुका साथै अति विपन्न सुत्केरी महिलाहरूको यातायात खर्च व्यवस्थापनका लागि रु. २,००० सहयोग गर्नुभएको छ।
त्यसैगरी, नवदुर्गा आधारभूत विद्यालयका ६ जना विद्यार्थीलाई विद्यालयमै पुगेर शैक्षिक सामग्री वितरण गर्नुभएको विद्यालयका प्रधानाध्यापक पिताम्बर ज्ञवालीले जानकारी दिनुभयो। उहाँका अनुसार यस्ता रचनात्मक कार्यले विद्यालय परिवारलाई प्रेरणा मिलेको छ भने अन्य व्यक्तिहरूले पनि यसबाट सिको गर्नुपर्ने आवश्यकता रहेको छ।
यस्तै, सरस्वती माध्यमिक विद्यालय, लिम्घाका ८ जना विद्यार्थीलाई शैक्षिक सामग्री वितरण गर्नुका साथै विद्यालयको विद्यार्थी कल्याणकारी कोषमा रु. आर्थिक सहयोग प्रदान गरिएको छ। विद्यालयका प्रधानाध्यापक मणिप्रसाद ज्ञवालीले यस्तो सहयोगले विद्यार्थीलाई प्रत्यक्ष लाभ पुग्ने र अभिभावकमा समेत सकारात्मक सोचको विकास हुने बताउनुभयो। उहाँले जन्मदिन जस्ता अवसरलाई सामाजिक उत्तरदायित्वसँग जोड्नु अनुकरणीय कार्य भएको उल्लेख गर्दै भट्टराईलाई शुभकामना व्यक्त गर्नुभयो। यस्तै लिम्घा निवासी बिरामी लाई उपचारका लागि पनि आर्थिक सहयोग गर्नु भएको छ ।
त्यसैगरी, एकसिङ्ग माध्यमिक विद्यालयका ६ जना विद्यार्थीलाई समेत शैक्षिक सामग्री वितरण गर्नुका साथै विपन्न विद्यार्थी कल्याण कोषमा आर्थिक सहयोग प्रदान गरिएको छ। विद्यालयमा अध्ययनमा अब्बल तर आर्थिक रूपमा कमजोर विद्यार्थीहरूको सहयोगका लागि आफूले यस्तो अभियान सञ्चालन गरेको भट्टराईले बताउनुभयो।
“रकम धेरै नभए पनि जन्मदिनको अवसरमा विद्यालय पुगेर विद्यार्थी भाइबहिनीहरूसँग खुसी साट्न पाउँदा अत्यन्तै सन्तुष्टि मिलेको छ,” भट्टराईले भन्नुभयो, “आगामी दिनमा पनि यस्ता रचनात्मक र समाज उपयोगी कार्यमार्फत सकारात्मक सन्देश फैलाउने प्रयास निरन्तर रहनेछ।”
भट्टराईको यस कार्यले जन्मदिनलाई केवल व्यक्तिगत उत्सवका रूपमा नभई समाज परिवर्तन र मानवीय सेवासँग जोड्न सकिने सन्देश दिएको स्थानीयवासीहरूले बताएका छन्। समाजमा बढ्दो फजुल खर्च र देखासिकी संस्कृतिका बीच उहाँको यो अभियान धेरैका लागि प्रेरणाको स्रोत बनेको छ।

पढाइसँगै रोजगारी : बुटवल उपमहानगरपालिकाद्वारा ‘पढाइ सँग रोजगार’ कार्यक्रम शुभारम्

चुरामणि तिमिल्सिना  रिडी  जेष्ठ  २७
बुटवल उपमहानगरपालिकाले विद्यार्थीलाई अध्ययनसँगै व्यावहारिक अनुभव र रोजगारीको अवसर प्रदान गर्ने उद्देश्यले ‘पढाइ सँग रोजगार’ कार्यक्रम सञ्चालनमा ल्याएको छ। आजदेखि औपचारिक रूपमा सुरु गरिएको यस कार्यक्रमअन्तर्गत क्याम्पसमा अध्ययनरत विद्यार्थीहरूलाई राजस्व व्यवस्थापनसम्बन्धी व्यावहारिक ज्ञान प्रदान गर्दै सीमित अवधिको रोजगारी उपलब्ध गराइनेछ।
उपमहानगरपालिकाका अनुसार विभिन्न क्याम्पसको सिफारिसका आधारमा प्रारम्भिक चरणमा १०० जना विद्यार्थी छनोट गरिएको छ। कार्यक्रममार्फत विद्यार्थीहरूले स्थानीय सरकारको राजस्व प्रणाली, कर प्रशासन तथा सेवाप्रवाहसम्बन्धी व्यवहारिक अनुभव हासिल गर्ने अवसर पाउनेछन्।
कार्यक्रममा सहभागी विद्यार्थीहरूलाई बुटवल उपमहानगरपालिकाका १९ वटै वडामा परिचालन गरिनेछ। यसबाट विद्यार्थीहरूलाई अध्ययनसँगै सार्वजनिक प्रशासनको अनुभव प्राप्त हुने, आत्मविश्वास वृद्धि हुने तथा रोजगारीसम्बन्धी सीप विकासमा टेवा पुग्ने विश्वास गरिएको छ।

कार्यक्रम शुभारम्भ समारोहमा खेलराज पाण्डे सहित जनप्रतिनिधि, कर्मचारी तथा विद्यार्थीहरूको उल्लेखनीय सहभागिता रहेको थियो। कार्यक्रममा बोल्दै नगरप्रमुख पाण्डेले युवाहरूलाई सीप, अनुभव र अवसरसँग जोड्ने उद्देश्यले कार्यक्रम सञ्चालन गरिएको बताउनुभयो। उहाँले स्थानीय सरकार र शैक्षिक संस्थाबीचको सहकार्यले विद्यार्थीको क्षमता अभिवृद्धि तथा भविष्य निर्माणमा महत्वपूर्ण योगदान पुग्ने विश्वास व्यक्त गर्नुभयो।बुटवल उपमहानगरपालिकाले विद्यार्थीमैत्री र रोजगारमुखी कार्यक्रमलाई आगामी दिनमा समेत निरन्तरता दिने जनाएको छ। स्थानीय तहबाट विद्यार्थीलाई अध्ययनसँगै अनुभव र आम्दानीको अवसर प्रदान गर्ने उद्देश्यले सुरु गरिएको यो कार्यक्रमलाई नवीन तथा उदाहरणीय पहलका रूपमा हेरिएको छ।

यम सोमै   स्याङ्जा    जेष्ठ  १४

न्यु होराइजन स्पोर्ट्स क्लबद्वारा कालीगण्डकीस्याङ्जाका ५ वटा विद्यालयमा शैक्षिक सामग्री वितरण

न्यु होराईजन स्पोर्ट्स क्लब बुटवलद्वारा कालीगण्डकी स्याङ्जाका ५ वटा विद्यालयमा शैक्षिक तथा खेलकुद सामग्री हस्तान्तरण गरिएको छ। न्यु होराईजन स्पोर्ट्स क्लवको अग्रसरतामा प्रदान गरिएको शैक्षिक तथा खेलकुदका सामग्री हस्तान्तरण कार्यक्रमलाई न्यु होराइजन बोर्डिङ स्कुल बुटवलले सहजीकरण जनाइएको छ। कालीगण्डकि गा.पा. वडा नम्बर २ मा अवस्थित श्री आदर्श मा.वि., वडा नम्बर १ मा अवस्थित श्री जनहित मा.वि. श्री कोटकोट आ. वि. , पिउघा मा.वि. र शिव आधारभूत विद्यालयम शैक्षिक तथा खेलकुदका कार्यक्रम वितरण गरिएको न्यु होइराजन स्पोर्ट्सक्लब शैक्षिक तथा खेलकुदका सामग्री वितरण कार्यक्रमका संयोजक नवीन थापाले जानकारी दिनु भयो।

खेल र शिक्षालाई संगै लैजाने प्रयत्न स्वरुप यो कार्यक्रमको आयोजना गरिएको समेत संयोजक थापाले जानकारी दिनु भयो। शैक्षिक सामग्री वितरणकै क्रममा न्यु होराइजन बोर्डिङ स्कुलका प्राचार्य श्री बासुदेव आचार्यले श्री आदर्श मा. वि.लाई अक्षयकोष स्थापनार्थ नगद रु १ लाख ५१ हजार प्रदान गर्नु भएको संयोजक नवीन थापाले जानकारी दिनु भयो।

चुरामणि तिमिल्सिना  रिडी जेष्ठ   १४

“महिनावारी लुकाउने होइन, बुझ्ने विषय हो” — सडक नाटकमार्फत सत्यवतीमा सशक्त सन्देश
“महिनावारीमैत्री समाजका लागि सहकार्य” भन्ने मूल नाराका साथ गुल्मीको सत्यवती गाउँपालिक स्थित सत्यवती माध्यमिक विद्यालय, हँसरामा विद्यार्थीहरूको सक्रिय सहभागितामा सडक नाटक तथा महिनावारी स्वच्छता सम्बन्धी जनचेतनामूलक कार्यक्रम सम्पन्न भएको छ।कार्यक्रममा विद्यार्थीहरूले प्रस्तुत गरेको सडक नाटकमार्फत महिनावारीसँग जोडिएका अन्धविश्वास, विभेद र सामाजिक गलत धारणाविरुद्ध सशक्त सन्देश प्रवाह गरिएको थियो। नाटकले महिनावारी प्राकृतिक र सम्मानजनक जैविक प्रक्रिया भएको तथा यसलाई लाज वा हेपाइको विषय नभई स्वास्थ्य र सचेतनासँग जोडेर हेर्नुपर्ने सन्देश दिएको थियो।
कार्यक्रमलाई सम्बोधन गर्दै सत्यवती गाउँपालिकाकी उपाध्यक्ष निरमाया तरामुले यस्ता जनचेतनामूलक कार्यक्रमले ग्रामीण समुदायमा सकारात्मक सन्देश प्रवाह गर्न महत्वपूर्ण भूमिका खेल्ने बताउनुभयो। उहाँले शहर केन्द्रित कार्यक्रमभन्दा गाउँगाउँमा पुगेर सचेतना फैलाउँदा नागरिकसम्म सूचना र ज्ञान छिटो तथा प्रभावकारी रूपमा पुग्ने धारणा व्यक्त गर्नुभयो।
उहाँले महिनावारीप्रति समाजमा रहेका विभेदकारी सोच, छुवाछुत तथा अन्धविश्वासको अन्त्य गर्न सबै पक्षको साझा सहकार्य आवश्यक रहेको उल्लेख गर्नुभयो।
यस्ता कार्यक्रममले “महिनावारी कमजोरी होइन, महिलाको प्राकृतिक शक्ति हो।“छाउपडी होइन, सम्मान र समानताको व्यवहार आवश्यक छ।“महिनावारीबारे खुला संवाद गरौँ, स्वस्थ र सभ्य समाज निर्माण गरौँ।”“सचेतना बढे विभेद घट्छ, सम्मान बढे समाज बदलिन्छ।”“महिनावारीलाई लाज होइन, ज्ञान र स्वास्थ्यसँग जोडौँ।”कार्यक्रमले किशोरी, अभिभावक तथा समुदायमा महिनावारी स्वच्छता र सम्मानजनक व्यवहारबारे सकारात्मक चेतना अभिवृद्धि गर्न सहयोग पुगेको सहभागीहरूले बताएका छन्।

प्रतिमा भट्टराई  रिडी   जेष्ठ  १३

गुल्मीको सत्यवती गाउँपालिका अन्तर्गत उल्लिखोलामा ४० दिने हार्मोनियम प्रशिक्षण कार्यक्रमको उद्घाटन गरिएको छ। “धार्मिक स्थलहरूलाई संरक्षण गरौँ, पर्यटन आगमनमा वृद्धि गरौँ” भन्ने मूल नारासहित रुरु धार्मिक सेवा सञ्चार प्रा.लि. को आयोजनामा प्रशिक्षण कार्यक्रम सञ्चालन गरिएको हो।

उद्घाटन सत्रलाई सम्बोधन गर्दै धार्मिक व्यक्तित्व लक्ष्मण ढकाल ले गाउँघरमा लुकेर रहेका प्रतिभाहरूलाई संगीतका माध्यमबाट बाहिर ल्याउन सकिए मात्र व्यक्तित्व विकास सम्भव हुने बताउनुभयो। पछिल्लो समय गाउँघरमा हार्मोनियम, मादल तथा रमझुराप्रति बढ्दो आकर्षण देखिएको उल्लेख गर्दै आफूहरूलाई पनि यस्तो कार्यक्रममा सहभागी भएर सिक्ने अवसर मिलेकोमा खुसी व्यक्त गर्नुभयो। उहाँले अन्यलाई समेत कार्यक्रममा सहभागी हुन आग्रह गर्दै संगीत अभ्यासले बुढेसकालमा मनलाई आनन्द दिने, दुःख बिर्साउने तथा मानसिक सन्तुलन कायम राख्न सहयोग पुग्ने बताउनुभयो।प्रशिक्षण कार्यक्रममा स्थानीय पाका पुस्ताको उल्लेखनीय सहभागिता रहेको छ। सहभागीका तर्फबाट धारणा राख्दै रामु ढकाल ले लामो समयदेखि सिक्न चाहेको विषय आज व्यवहारमा प्राप्त हुँदा अत्यन्त खुसी लागेको बताउनुभयो। उहाँले आसपासका दिदीबहिनी, दाजुभाइ तथा युवायुवतीहरूलाई कार्यक्रममा सहभागी भएर प्रशिक्षण लिन हार्दिक अपिल समेत गर्नुभयो।कार्यक्रमका विशिष्ट अतिथि तथा प्रमुख प्रशिक्षक राष्ट्रिय भजन गायक बिपिन तिवारी ले पछिल्लो समय भजन क्षेत्रमा बढ्दो आकर्षणका कारण आफूलाई समय व्यवस्थापन गर्न समेत कठिन भएको अनुभव सुनाउनुभयो। उहाँले प्रशिक्षणमार्फत गाउँघरमा लुकेर रहेका भजनका लयहरूलाई हार्मोनियममा बजाउन सक्ने क्षमता विकास गराउने, भजन–चुड्कालाई सही लयमा गाउन सिकाउने तथा यहाँ प्रशिक्षण लिने विद्यार्थीहरूलाई भविष्यमा अन्यत्र पनि प्रशिक्षकको भूमिकामा काम गर्न सक्ने बनाउने प्रतिबद्धता व्यक्त गर्नुभयो। साथै, कार्यक्रम आयोजना गर्ने धार्मिक संस्थाप्रति धन्यवाद ज्ञापन गर्नुभयो।कार्यक्रममा स्थानीय बासिन्दाको सहभागिता रहेको थियो। कार्यक्रममा बोल्दै चुरामणि तिमल्सिना ले रिडी तथा आसपासका क्षेत्रमा यस्ता प्रशिक्षण कार्यक्रमलाई निरन्तरता दिने योजना रहेको बताउनुभयो। उहाँले आगामी दिनमा स्थानीय सरकार, वडा कार्यालय तथा विद्यालयहरूसँग सहकार्य गर्दै अन्य स्थानमा समेत कार्यक्रम विस्तार गरिने जानकारी दिनुभयो।

चुरामणि तिमिल्सिना  रिडी जेष्ठ  १२

रामकोट आधारभूत विद्यालय मा विद्यालय व्यवस्थापन समितिको पुनर्गठन सम्पन्न भएको छ। विद्यालय व्यवस्थापन समितिका अध्यक्ष कमल सुनारको अध्यक्षतामा सम्पन्न अभिभावक भेलामा प्रमुख अतिथिका रूपमा वडा नं. ७ का वडा अध्यक्ष अनन्तराम भण्डारी को उपस्थिति रहेको थियो।
भेलाले हरिलाल आचार्यको अध्यक्षतामा नयाँ विद्यालय व्यवस्थापन समिति गठन गरेको हो। समितिको सदस्यहरूमा पदमपानी भण्डारी, नानुमाया पुलामी र निरुता नेपाली वडा प्रतिनिधि बिष्णु बिक चयन हुनुभएको छ।

त्यसैगरी, अभिभावक भेलाले पवित्रा रामजालीको अध्यक्षतामा शिक्षक अभिभावक संघ समिति गठन गरेको छ। समितिका सदस्यहरूमा विष्णु गैरे, रुपा थापा, लक्ष्मी सुवेदी, मञ्जु भट्टराई, विष्णु भण्डारी, कल्पना थापा र हिरा थापा चयन हुनुभएको छ।
भेलाले विद्यालय व्यवस्थापन समितिका अध्यक्ष हरिलाल आचार्यको संयोजकत्वमा खाजा समिति समेत गठन गरेको छ। समितिका सदस्यहरूमा इन्दिरा भण्डारी, जमुना गैरे र कविता आचार्य रहनुभएको छ।
सात वर्षसम्म विद्यालय व्यवस्थापन समितिको अध्यक्ष पदमा रही कार्यसम्पादन गर्नुभएका कमल सुनारले आफ्नो कार्यकालमा सहयोग गर्ने विद्यालय परिवार, अभिभावक तथा सम्पूर्ण सहयोगी दाताप्रति हृदयदेखि धन्यवाद व्यक्त गर्नुभएको थियो।

उहाँले आगामी दिनमा पदमा रहे पनि नरहे पनि विद्यालयको चौतर्फी विकासका लागि निरन्तर सक्रिय रहने प्रतिबद्धता जनाउनुभयो।
नवनिर्वाचित कार्यसमितिलाई सोमबार नै शपथ ग्रहण गराई कार्यभार समेत हस्तान्तरण गरिएको थियो। विद्यालयकी प्रधानाध्यापक बसन्ती न्यौपानेले अतिथिहरूलाई स्वागत गर्दै कार्यक्रममाथि प्रकाश पार्नुभएको थियो। कार्यक्रमको सहजीकरण यज्ञमूर्ति भण्डारी र अनिता भण्डारीले गर्नुभएको थियो।

गुल्मी    जेष्ठ ११ चुरामणि तिमिल्सिना

नेपाल रेडक्रस सोसाइटी रूपाकोट उपशाखाको सहजीकरण तथा व्यवस्थापनमा नेपाल नेत्र ज्योति सङ्घ जिल्ला शाखा गुल्मी तथा शान्तिपुर आँखा उपचार केन्द्र गुल्मीको आयोजनामा चन्द्रकोट गाउँपालिका–७ दमुकास्थित श्री रामकोट आधारभूत विद्यालयमा निःशुल्क आँखा जाँच शिविर सम्पन्न भएको छ।
मिति २०८३ साल जेठ १० गते आइतबार सञ्चालन गरिएको शिविरमा २०५ जनाको आँखा परीक्षण गरिएको थियो। परीक्षण गरिएकामध्ये ११७ जनालाई निःशुल्क चस्मा वितरण गरिएको आयोजकले जनाएको छ। त्यसैगरी १९३ जनालाई औषधि तथा स्वास्थ्य परामर्श सेवा प्रदान गरिएको थियो। शिविरमा ४ जनामा मोतियाबिन्दुको समस्या देखिएको र थप ४ जनामा जटिल आँखासम्बन्धी समस्या भेटिएकाले उनीहरूलाई थप उपचार तथा शल्यक्रियाका लागि भैरहवा आँखा अस्पताल रिफर गरिएको जानकारी दिइएको छ।
शिविर सफल बनाउन सहयोग पुर्‍याउने चन्द्रकोट गाउँपालिका कार्यालय, वडा नं. ७ को कार्यालय रूपाकोट, शान्तिपुर आँखा उपचार केन्द्रका अध्यक्ष, सचिव, सदस्य, कार्यालय प्रमुख, चालक तथा सम्पूर्ण कर्मचारीप्रति आयोजकले आभार व्यक्त गरेको छ। साथै सामाजिक व्यक्तित्व दिल्लीराज भण्डारी, सुरेश भण्डारी, भोजराज भण्डारी, युवराज भण्डारी, जङ्गबहादुर थापा, रामु भण्डारी, तुराङ उपशाखाका सभापति मुमलाल श्रेष्ठ, कार्यक्रम समन्वयमा सहजीकरण गर्ने यज्ञमुर्ति भण्डारी तथा आवश्यक भौतिक सहयोग उपलब्ध गराउने श्री रामकोट आधारभूत विद्यालय परिवारलगायत प्रत्यक्ष तथा अप्रत्यक्ष रूपमा सहयोग गर्ने सबैप्रति धन्यवाद व्यक्त गरिएको छ।